«Судьялардың қауіпсіздігін қамтамасыз ету жүйесіндегі тағылатын идентификациялық жетон тұжырымдамасы»

«Сот төрелігі академиясының хабаршысы» ғылыми журналында Жоғары Сот Кеңесінің Төрағасы Дмитрий Малахов пен Қазақстан Республикасы Бас прокуратурасының жанындағы Құқық қорғау органдары академиясының докторанты Аслан Аскаровтың мақаласы жарияланды.

Мақала тақырыбы:«Судьялардың қауіпсіздігін қамтамасыз ету жүйесіндегі тағылатын идентификациялық жетон тұжырымдамасы».

Материалда цифрландыру және қауіп-қатерлер сипатының өзгеруі жағдайында судьялардың қауіпсіздігін қамтамасыз ету мәселесінің өзектілігі қарастырылады.

Дәстүрлі қорғаныс шараларының, негізінен сот ғимараттарын күзетуге бағытталған тәсілдерінің, қазіргі заманғы сын-қатерлерге толық жауап бере алмайтыны атап өтіледі. Қауіптердің едәуір бөлігі сот ғимараттарынан тыс жерде туындап, кенеттен немесе жасырын сипатқа ие болады.

Авторлар судьяларға қысым көрсетудің заманауи түрлерін, сондай-ақ оларды қорғау саласындағы халықаралық және ұлттық тәжірибені талдайды.

Зерттеу қорытындысы бойынша қауіпсіздікті қамтамасыз етудің жекешелендірілген және превентивтік тетіктеріне көшу қажеттілігі негізделеді. Шешімдердің бірі ретінде судьяны қорғау жүйесімен тұрақты байланысын қамтамасыз ететін және қауіп-қатерлерге жедел әрекет етуге мүмкіндік беретін киілетін жедел әрекет ету құралдарын енгізу ұсынылады.

Қорытындылар судьялардың қауіпсіздігін қамтамасыз ету бойынша заңнаманы жетілдіруде және практикалық шараларды әзірлеуде қолданылуы мүмкін.

«Сот төрелігі академиясының хабаршысы» — Қазақстан Республикасы Ғылым және жоғары білім саласындағы сапаны қамтамасыз ету комитеті ұсынған басылымдар тізбесіне енгізілген ғылыми журнал. Басылым құқық және сот төрелігі саласындағы зерттеулерді жариялап, академиялық жарияланым этикасының халықаралық стандарттарына сәйкес келеді және отандық әрі шетелдік авторлар арасында ғылыми тәжірибе алмасу алаңы болып табылады.