Жоғары Сот Кеңесінің Төрағасы Дмитрий Малаховтың Астана мемлекеттік қызмет хабы Басқару комитетінің Төрағасы Алихан Байменовпен жұмыс кездесуі өтті

Жоғары Сот Кеңесінің Төрағасы Дмитрий Малаховтың Астана мемлекеттік қызмет хабы Басқару комитетінің Төрағасы Алихан Байменовпен жұмыс кездесуі өтті.

Шараға Жоғары Сот Кеңесінің мүшелері, Кеңес аппаратының қызметкерлері, сондай-ақ Астана мемлекеттік қызмет хабы Басқару комитетінің өкілдері қатысты.

Кездесу барысында тараптар өзара іс-қимылдың қазіргі жағдайын талқылап, бұрын қол қойылған меморандум аясында одан әрі ынтымақтастықтың негізгі бағыттарын айқындады.

Сондай-ақ судьялар корпусын қалыптастыру жүйесін жетілдіру шеңберінде іске асырылып жатқан Жоғары Сот Кеңесі қызметіндегі негізгі өзгерістер мен жаңашылдықтар таныстырылды.

Серіктестіктің басым бағыттарының бірі — Кеңес мүшелері мен аппарат қызметкерлерінің құзыреттерін дамыту, оның ішінде судья лауазымына кандидаттармен сұхбат жүргізудің заманауи әдістемелерін, өзекті HR-құралдары мен бағалау практикаларын қолдану арқылы оқыту болып табылады.

Тараптар судья кадрларын іріктеу рәсімдерінің сапасын, объективтілігін және ашықтығын арттыруға бағытталған ынтымақтастықты одан әрі дамытуға мүдделіліктерін растады.