«Qyzmet-Police.kz» жобасы

Қазақстан Республикасының Ішкі істер министрлігі қызметке қабылдау үдерісін толық автоматтандыратын «Qyzmet-Police.kz» жаңа цифрлық платформасын таныстырды.
Енді Қазақстан азаматтары полиция қызметіне онлайн форматта өтініш бере алады — кезексіз, қағаз құжаттарсыз және жеке барып жүгінусіз. Платформа ел өңірлері бойынша барлық бос жұмыс орындарын біріктіреді, бұл үміткерлерге қала, бөлімше және лауазымды таңдап, бірден өтініш беруге мүмкіндік береді.
Құжаттар сайт арқылы бір рет жүктеледі. Үміткерлерді іріктеу толығымен цифрлық жүйе арқылы жүзеге асырылады. Әрбір кезең автоматты түрде тіркеліп, рәсімнің ашықтығын қамтамасыз етеді және сыбайлас жемқорлық тәуекелдерін болдырмайды.
Сонымен қатар, «Qyzmet-Police.kz» платформасында әрбір лауазым бойынша жалақы мөлшері мен тұрғын үй төлемдері туралы толық ақпарат ұсынылған. Үміткерлер өтінішінің мәртебесін онлайн режимде — өтініш берген сәттен бастап сұхбатқа шақырылғанға дейін — қадағалай алады.
«Qyzmet-Police.kz» жобасы ІІМ-нің цифрлық трансформациясы аясында жүзеге асырылып, кадр саясатының ашықтығы мен халықтың сенімін арттыруға бағытталған. Платформа тұрғылықты жеріне немесе жеке байланыстарына қарамастан, барлық азаматтар үшін ішкі істер органдарында қызмет етуге тең қолжетімділікті қамтамасыз етеді.