Шығыс Қазақстан облысында 23.07.2025 жылы жер сілкінісі болды

ШҚО-да жедел штаб құрылып, «жедел желі» іске қосылды

2025 жылғы 23 шілдеде Астана уақытымен сағат 15:37-де Қазақстан Республикасы Төтенше жағдайлар министрлігіне қарасты «Сейсмологиялық зерттеулер мен ақпараттың ұлттық ғылыми орталығы» ЖШС-нің сейсмикалық станциялар желісі жер сілкінісін тіркеді.
Зілзаланың эпицентрі Алматы қаласынан солтүстік-шығысқа қарай 793 шақырым қашықтықта орналасқан. Шығыс Қазақстан облысының аумағында 2–4 балл аралығындағы жер асты дүмпулері сезілген. Қайтыс болғандар мен қираған нысандар туралы ақпарат тіркелген жоқ.
Барлық шұғыл қызметтер күшейтілген жұмыс режиміне көшірілді. Халықты хабардар ету үшін дабыл жүйесі, мобильді операторлар арқылы SMS-хабарлама, телерадиохабар таратуды тоқтату жүйесі, сондай-ақ «Дәрмен» қосымшасы қосылды.
ШҚО Төтенше жағдайлар департаментінде облыс әкімінің орынбасары Бақытжан Байахметовтың басшылығымен жедел штаб құрылды. Ресми ақпарат ҚР ТЖМ, ШҚО ТЖД сайттарында және ведомстволық телеграм-арналарда жарияланды.
Азаматтардың сұрақтары бойынша 8(7232)55-38-19 нөмірі арқылы «жедел желі» іске қосылды.
«Өмір тіршілігін қамтамасыз ететін барлық нысандар қалыпты режимде жұмыс істеуде. Инженерлік құрылыстар мен өзен арналарына бақылау жалғасын табуда. Өңірде қирау мен зардап шеккендер туралы мәліметтер тіркелген жоқ. 112 және 101 байланыс желілеріне түскен барлық қоңыраулар мұқият қаралуда.
Облыс тұрғындарын сабыр сақтауға, үрейге бой алдырмауға және тек ресми ақпаратқа сенуге шақырамын. Жалған ақпарат тарату – құтқару қызметтерінің жұмысына кедергі келтіріп, негізсіз алаңдаушылық туғызады. Гидропосттар мен инженерлік-техникалық қызметкерлер әрекет ету алгоритміне сәйкес тексеру жұмыстарын жалғастыруда. Зардап шеккендер мен қираулар жөнінде ақпарат жоқ. Баршаңызды қауіпсіздік шараларын сақтауға шақырамын», – деді ШҚО әкімі Нұрымбет Сақтағанов.
Естеріңізге саламыз: жер сілкінісі кезінде сақталуы тиіс 10 қарапайым қадам:

1. Сабыр сақтаңыз, ДҮРБЕЛЕҢ ЖАСАМАҢЫЗ!

2. Дүмпу кезінде лифт пен баспалдақты пайдаланбаңыз.

3. Терезе, жиһаз, шамдардан аулақ болыңыз.

4. Сенімді, берік орынға тығылыңыз: егер жоғары қабатта болсаңыз, тіреуіш қабырға бұрыштарын паналаңыз.

5. Дүмпу басылғаннан кейін ғана ғимараттан шығыңыз.

6. Су, газ, электр қуатын өшіріңіз.

7. Алдын ала дайындалған дабыл сөмкесін алыңыз.

8. Электр желілерінен, ғимараттар мен ағаштардан аулақ жүріңіз.

9. Қайталама дүмпулерге дайын болыңыз.

10. Қарт адамдарға, мүмкіндігі шектеулі азаматтарға көмектесіңіз.