ШҚО жеңіл атлеттерінің Тяньцзиньдегі Азия чемпионатындағы жарқын жеңістері

6–8 ақпан аралығында Қытайдың Тяньцзинь қаласында жеңіл атлетикадан жабық ғимараттағы 12-ші Азия чемпионаты өтті. Шығыс Қазақстан облысы мен Shygys Athletics клубының спортшылары Қазақстан ұлттық құрамасы сапында өнер көрсетіп, айтарлықтай табыстарға қол жеткізді.

Жарыстың басты сенсациясы Нора Джеруто Тануи болды. Ол 3000 метр қашықтықты 8:46.87 уақытында бағындырып, алтын медаль иеленді және Азия чемпионы атанды. Сонымен қатар, ол 1500 метрлік қашықтықта 4:20.04 нәтижесімен қола жүлдегер атанды.

Биіктікке секіруден Надежда Дубовицкая (бапкері М.И. Фролов) керемет өнер көрсетті. 11 мықты спортшы қатысқан тартысты финалда Надежда 1.87 м нәтижесімен күміс медаль жеңіп алды. Екінші «күмісті» 400 метрге жүгіруден Эльнор Мухитдинов иеленді.

Сондай-ақ, Андрей Соколов пен Эльнор Мухитдинов 4×400 метрлік эстафетада қола жүлдеге ие болса, Юлия Башманова 60 метрге кедергілер арқылы жүгіруде 4-ші орынға табан тіреді. Шығысқазақстандық спортшылардың бұл жетістіктері өңіріміздегі жеңіл атлетика мектебінің жоғары деңгейін және халықаралық аренадағы бәсекеге қабілеттілігін паш етті.