140 мың грант: Қазақстанда колледждерге құжат қабылдау жалғасуда
Қазақстанда 2026–2027 оқу жылына арналған колледждерге құжат қабылдау науқаны жалғасуда. Қазіргі уақытта 55 мыңға жуық талапкер өтініш берген. Оқу-ағарту министрлігінің баспасөз қызметінің хабарлауынша, биыл өңір әкімдіктері колледждерде мамандар даярлауға арналған мемлекеттік білім беру тапсырысы шеңберінде 140 мың білім беру грантын бөлді.
«Мемлекеттік білім беру тапсырысының негізгі бөлігі еңбек нарығында сұранысқа ие техникалық мамандықтарға бағытталған. Сонымен қатар, заманауи технологиялық үрдістер мен жұмыс берушілердің қажеттіліктерін ескере отырып, «Жасанды интеллект технигі», «Мехатроника», «Жаңартылатын энергетика», «Графикалық анимация технигі», «Экологиялық туризм менеджері» және басқа да сұранысқа ие жаңа перспективалы мамандықтар бойынша кадрлар даярлау қолға алынды», – делінген хабарламада.
Сондай-ақ колледждерге түсу кезінде азаматтардың жекелеген санаттары үшін квоталар қарастырылған. Атап айтқанда, ауыл жастары үшін – 35%, мүгедектігі бар адамдар үшін – 10%, көпбалалы отбасылардан шыққан балалар үшін – 5%, жетім балалар мен ата-анасының қамқорлығынсыз қалған балалар үшін – 1% орын бөлінген. Бұдан бөлек, заңнамаға сәйкес азаматтардың тағы алты санаты үшін квоталар көзделген. Құжат тапсыру кезінде талапкерлер eGov.kz порталы арқылы квотаға құқықтарын көрсете алады.
Құжаттарды электрондық үкімет порталы арқылы да, таңдаған колледжге тікелей де тапсыруға болады. Әрбір талапкер төрт мамандық пен төрт колледжді таңдауға құқылы. Жұмысшы біліктіліктері бойынша құжат қабылдау 27 тамызға дейін жалғасады. Оқуға қабылдау түсу емтихандарынсыз, әңгімелесу нәтижелері бойынша жүзеге асырылады.
Орта буын мамандықтарына түсушілер үшін құжат қабылдау 20 тамызда аяқталады. Конкурс 23–24 тамыз күндері аттестаттың орташа балы негізінде өткізіледі.
Педагогикалық және медициналық мамандықтарға құжат қабылдау 10 тамызға дейін жалғасады. Конкурс 16–17 тамыз күндері өтеді. Педагогикалық мамандықтарға түсушілер үшін әңгімелесу, эссе немесе диктант қарастырылған, ал медициналық мамандықтарға түсушілер арнайы емтихан тапсырады. Шығармашылық мамандықтарға түсушілер үшін шығармашылық сынақтар өткізіледі. Министрліктің мәліметінше, конкурстық іріктеудің ашықтығы мен әділдігін қамтамасыз ету мақсатында іріктеу Ұлттық білім беру деректер қорының ақпараттық жүйесі арқылы автоматтандырылған режимде жүргізіледі.
Ақылы негізде оқуға құжат қабылдау 27 тамызға дейін, ал кешкі және сырттай оқу нысандарына 20 қыркүйекке дейін жалғасады. Ведомствоның мәліметінше, 9 және 11-сынып түлектері мемлекеттік білім беру тапсырысы есебінен еңбек нарығында сұранысқа ие мамандықты тегін меңгере алады.