Облыс әкімдігінде облыс әкімі аппаратының, туризм, ішкі саясат, экономика және бюджеттік жоспарлау, кәсіпкерлік және өнеркәсіп басқармаларының мемлекеттік қызметшілеріне арналған деструктивті діни ағымдардың қызметіне тартылудың алдын алу тақырыбында семинар ұйымдастырылды.

Іс-шараның негізгі мақсаты –мемлекеттік қызметшілердің деструктивті діни идеологиялардың таралуына байланысты қазіргі қауіптер туралы хабардарлығын арттыру, олардың теріс ықпалына төзімділігін қалыптастыру, мемлекеттік қызметте зайырлылық, заңдылық және кәсіби әдеп қағидаттарын нығайту.

Семинар барысында мемлекеттік қызметшілердің «ҚР мемлекеттік қызметшілерінің әдеп кодексі» нормаларын қатаң сақтауының маңызы атап өтілді. Сондай-ақ Конституциялық қағидаттар мен ел заңнамасына қайшы келетін мақсаттарды көздейтін ұйымдар мен бірлестіктердің қызметіне қатысуға жол бермеу қажеттігі айтылды.

Семинарға қатысушыларға Қазақстан Республикасының діни қызмет саласындағы заңнама талаптары, діни қауіпсіздікті қамтамасыз ету мәселелері, азаматтардың деструктивті діни ағымдар мен ұйымдардың қызметіне тартылуының алдын алу шаралары түсіндірілді.

Семинар жұмысына Дін істері басқармасы Дін мәселелерін зерттеу орталығының теолог маманы Назарбеков Р.Т. қатысып, деструктивті діни идеяларды таратудың заманауи тәсілдері мен әдістері, тұлғаның радикалдану белгілері, ықтимал қауіптерді анықтау жолдары, діни экстремизм мен терроризмнің алдын алу шаралары туралы мазмұнды баяндама жасады.

Сондай-ақ ақпараттық қауіпсіздік мәселелеріне, интернет-ресурстар мен әлеуметтік желілер арқылы таралатын ақпаратты сыни тұрғыдан қабылдауға, мемлекеттік қызметшілердің қоғамдық келісімді, конфессияаралық татулық пен қоғамдағы тұрақтылықты нығайтудағы рөліне ерекше назар аударылды.

Іс-шара соңында пікір алмасу ұйымдастырылып, қатысушылар деструктивті діни ағымдардың алдын алу мәселелері бойынша өзекті сұрақтарын қойып, мамандардан жан-жақты жауап алды.

Осындай профилактикалық іс-шараларды өткізу мемлекеттік қызметшілердің құқықтық және діни сауаттылығын арттыруға, адалдық пен жауапкершілік қағидаттарын нығайтуға, өңірдегі қоғамдық тұрақтылық пен конфессияаралық келісімді сақтауға ықпал етеді.

Шығыс Қазақстан облысының әкімі Нұрымбет Сақтағанов Халықаралық балаларды қорғау күніне орай өңірдің белсенді әрі дарынды балаларымен кездесіп, оларды мерекемен құттықтады.

Аймақ басшысы облыстың намысын республикалық және халықаралық олимпиадаларда, ғылыми, шығармашылық және спорттық жарыстарда абыроймен қорғап жүрген оқушылардың жетістіктерін атап өтті.

Балалар мерекесіне орай облыс әкімі жас шығысқазақстандықтарға ақшалай сертификаттар табыстады. Сонымен қатар олардың әрқайсысына «Дарын» жазғы сауықтыру лагеріне жолдама сыйға тартылды.

«Мемлекет басшысы Қасым-Жомарт Тоқаев балалар мен жастарды қолдауды мемлекеттік саясаттың маңызды басымдықтарының бірі ретінде қарастырады. Сондықтан біздің ортақ мақсатымыз – әрбір балаға жан-жақты дамуға, сапалы білім алуға және өзін-өзі жүзеге асыруға мүмкіндік жасау», – деді Шығыс Қазақстан облысының әкімі.

Салтанатты бөлімнен кейін жас қонақтарға мерекелік концерттік бағдарлама ұйымдастырылды. Гала-концертте облыстың аудандары мен қалаларынан келген талантты би ұжымдары мен вокалдық ансамбльдер өнер көрсетті. Оларға да ақшалай сертификаттар табысталды.

ШҚО әкімі оқушыларға оқу, ғылым, спорт және шығармашылықтағы жетістіктері үшін алғыс білдірді: «Биыл облыс оқушылары жеңіп алған 171 медаль – үлкен мақтаныш. Бірақ одан да маңыздысы – еліміздің болашағын қалыптастыратын бастамашыл, талантты әрі мақсатшыл жас буынның өсіп келе жатқаны».

Айта кетейік, биыл жас шығысқазақстандықтар республикалық және халықаралық олимпиадалар мен байқауларда 171 медаль жеңіп алды. Оның ішінде 37 алтын, 46 күміс және 88 қола медаль бар. Бұл өңірдегі білім беру сапасының жоғары деңгейін және жастардың зор әлеуетін тағы бір мәрте дәлелдейді.

Балалардың құқықтары мен заңды мүдделерін қорғау Қазақстан Республикасы Конституциялық Соты қызметінде ерекше орын алады. Отбасылық қатынастарға, алименттік міндеттемелерге, бала асырап алуға, баланың ұлтын айқындау мәселелеріне және өзге де салаларға қатысты істерді қарау барысында Конституциялық Сот әрдайым баланың мүддесін барынша қамтамасыз ету жөніндегі конституциялық қағидатқа сүйенеді.

Конституциялық Соттың нормативтік қаулылары мен қорытынды шешімдерінде қалыптастырылған құқықтық ұстанымдар заңнаманы және құқық қолдану практикасын жетілдіруге, құқықтық айқынсыздықты жоюға және балалар құқықтарын қорғау кепілдіктерін нығайтуға ықпал етеді. Қаралатын құқықтық қатынастардың әртүрлілігіне қарамастан, оларды ортақ бір тәсіл біріктіреді: балалардың құқықтары мен заңды мүдделеріне қатысты мәселелерді реттеу кезінде баланың әл-ауқатын қамтамасыз ету мен оның мүдделерін қорғауға басым мән берілуге тиіс.

✅ 2023 жылғы 1 маусымдағы №18-НҚ нормативтік қаулысында Конституциялық Сот азаматтардың сотқа жүгінуіне дейін молекулалық-генетикалық сараптама жүргізу талабын заңсыз деп көрсетті. Аталған талап мемлекеттің баланың мүддесін барынша қамтамасыз ету міндетіне сәйкес келмейді деп танылып, кейіннен күшін жойды.

✅ 2024 жылғы 28 маусымдағы №46-НҚ қорытынды шешімінде Конституциялық Сот жеке кәсіпкерлер үшін алимент мөлшерін есептеу кезінде құқықтық айқынсыздық бар екенін анықтады. Сот алимент төлеушінің нақты табыстары ескерілуі қажеттігін атап өтті, өйткені алимент мөлшерін айқындаудағы қателіктер тікелей баланың мүддесіне әсер етеді. Шешім қорытындысы бойынша кәсіпкердің кірістері мен шығыстарын ескере отырып алимент есептеу тетігі бекітілді.

✅ 2024 жылғы 23 шілдедегі №49-НҚ қорытынды шешімінде Конституциялық Сот «Неке (ерлі-зайыптылық) және отбасы туралы» кодекстің бала асырап алуға қатысты нормасын конституциялық емес деп таныды. Сот заңнамалық тетіктер баланы отбасында тәрбиелеу мен дамыту үшін оның мүдделері мен қажеттіліктеріне сай неғұрлым қолайлы жағдайлар жасауға бағытталуы тиіс екенін көрсетті. Аталған құқықтық қатынастар Конституцияға сәйкестендірілді.

✅ 2024 жылғы 24 желтоқсандағы №58-НҚ қорытынды шешімінде Конституциялық Сот бірнеше сот актілері бойынша алимент өндіру мәселелерін неғұрлым толық реттеу қажеттігіне назар аударды. Кейіннен Жоғарғы Сот нормативтік қаулыға тиісті өзгерістер енгізді, бұл балалардың мүліктік мүдделерін қорғау кепілдіктерін күшейтуге мүмкіндік берді.

✅ 2025 жылғы 16 сәуірдегі №70-НҚ нормативтік қаулысында Конституциялық Сот «Неке (ерлі-зайыптылық) және отбасы туралы» кодекстің ата-аналары белгісіз болған не олардың ұлтын анықтау мүмкін болмаған жағдайларда баланың ұлтын айқындау және өзгерту тәсілдерінің болмауына қатысты нормасын Конституцияға сәйкес емес деп таныды. Сот баланың құқықтары мен заңды мүдделеріне әсер ететін өмірлік жағдайларды ескеру қажеттігін атап өтті.

✅ 2026 жылғы 18 мамырдағы №80-НҚ қорытынды шешімінде Конституциялық Сот ата-аналарға қатысты әкімшілік қамақ қолданудағы айырмашылықтар жыныс белгісіне емес, ата-ананың балаға үздіксіз күтім жасауды қамтамасыз етуге нақты қатысу дәрежесіне байланысты екенін, сондықтан бұл кемсітушілік болып табылмайтынын атап өтті. Сот заң шығарушы қолданатын «он төрт жасқа дейінгі бала» санаты баланың тұрақты күтімге, тәрбие мен қамқорлыққа жоғары тәуелділігін көрсететінін атап көрсетті.

Қазақстан Республикасы Конституциялық Сотының практикасы балалардың құқықтары мен заңды мүдделерін қорғау конституциялық бақылаудың басым бағыттарының бірі екенін дәйекті түрде растайды. Соттың нормативтік қаулылары мен қорытынды шешімдерінде қалыптастырылған құқықтық ұстанымдар заңнаманы жетілдіруге, құқықтық айқынсыздықты жоюға және бала құқықтарын іске асыру кепілдіктерін нығайтуға ықпал етеді. Конституциялық Сот қалыптастырған тәсілдерді заңнама мен құқық қолдану практикасына дәйекті енгізу балалар құқықтарын неғұрлым тиімді қорғауды қамтамасыз етіп, әділеттілік, гуманизм және құқық үстемдігі қағидаттарын нығайтудың маңызды шарты болып қызмет етеді.

Құрметті қазақстандықтар!

Қазақстан Республикасы Президентінің жанындағы Әйелдер істері және отбасылық-демографиялық саясат жөніндегі ұлттық комиссия жол-көлік оқиғалары салдарынан балалардың қаза болуы мен жарақат алу жағдайларының жиілеп кетуіне алаңдаушылық білдіреді.

Жаз мезгілінде балалар үйден тыс жерде көбірек уақыт өткізеді. Олар көшеде, аулада, спорт және ойын алаңдарында болады, велосипед, самокат тебеді, демалыс орындарына барады, саяхаттайды.

Сондықтан дәл осы кезеңде балалардың қауіпсіздігі ересектердің қырағылығы мен жауапкершілігіне тікелей байланысты.

Осыған байланысты Ұлттық комиссия ата-аналарды, жүргізушілерді және барша азаматтарды алдағы жазғы демалыс кезінде балалардың өмірі мен денсаулығына ерекше жауапкершілікпен қарауға шақырады.

Құрметті ата-аналар!

Балаларыңызбен жолда, аулада, су айдындары маңында және табиғат аясында өзін қауіпсіз ұстау қағидалары туралы сөйлесіңіздер. Бұл ережелерді үнемі естеріне салып отырыңыздар.

Балаларға жолда аса мұқият болу қажеттігін түсіндіріңіздер. Жолды тек жаяу жүргіншілер өткелімен және қауіпсіздігіне көз жеткізгеннен кейін ғана кесіп өту қажет. Ал өткелден өтпес бұрын міндетті түрде велосипедтен немесе самокаттан түсу керек.

Велосипед, самокат немесе ролик тепкен кезде балалардың қорғаныш құралдарын пайдалануын қамтамасыз етіңіздер.

Үйдегі қауіпсіздік мәселесіне де ерекше назар аударыңыздар. Терезелерді қорғаныш құрылғыларынсыз ашық қалдырмаңыздар, баланың құлап кетуіне әкелуі мүмкін жағдайларға жол бермеңіздер, сондай-ақ қауіпті заттар мен химиялық заттардың қауіпсіз орындарда сақталуын қамтамасыз етіңіздер.

Балаларды қараусыз қалдырмаңыздар, олардың қай жерде жүргенін бақылауда ұстағандарыңыз абзал. Әсіресе, кешкі уақытта балалардың ересектердің қарауынсыз сыртта жүруіне жол бермеңіздер.

Осы қарапайым ережелер баланың ең қымбат байлығы - өмірі мен денсаулығын сақтауға көмектеседі.

Құрметті жүргізушілер!

Көпшілігіңіз – ата-анасыздар, аға-әпкесіздер. Көлік тізгініне әр отырған сайын осыны есте сақтаңыздар.

Жолда, әсіресе тұрғын үйлердің маңында, аулаларда, саябақтар мен балалар алаңдарының жанында аса мұқият болыңыздар.

Жылдамдық режимін сақтаңыздар, жаяу жүргіншілер өткелі мен аулаға жақындағанда жылдамдықты төмендетіңіздер.

Көлік жүргізу кезінде мобильді құрылғыларды пайдаланудан бас тартыңыздар.

Бала көлікті байқамай қалуы мүмкін. Ал жүргізуші баланы міндетті түрде байқауға тиіс.

Балалардың өмірі Сіздің бір сәт назар аударуыңызға байланысты болуы мүмкін.

Құрметті қазақстандықтар!

Балалардың өмірі мен денсаулығы - отбасының, қоғамның және мемлекеттің ортақ жауапкершілігі.

Ешқандай алдын алу шаралары ересектердің қырағылығы, жеке өнегесі мен балаларға деген жанашырлығын алмастыра алмайды.

Балаларымыздың жазғы демалысы қауіпсіз өтуі үшін баршамыз бірлесіп күш салайық.

ҚР Президентінің жанындағы Әйелдер істері және отбасылық-демографиялық саясат жөніндегі ұлттық комиссия

«AMANAT» партиясының «Ауыл аманаты» жобасы ауылдық жерлердегі кәсіп бастаған азаматтарды қолдаудың тиімді тетігіне айналып, өңірдегі шағын бизнестің дамуына және ауыл экономикасының жандануына айтарлықтай серпін беріп отыр. Партияның бастамасымен жүзеге асырылып жатқан жоба ұлттық құндылықтарды дәріптеу мен ауыл туризмін дамытуға бағытталған нақты нәтижелерімен ерекшеленуде. Соның жарқын үлгісі – кәсіпкер Назым Қыстаубаеваның этноауыл жобасы.
«AMANAT» партиясының жүйелі қолдауының арқасында Шығыс Қазақстан облысы Шемонаиха ауданы аумағындағы көрікті «Марьин утес» ескерткіші маңында ұлттық ат туризмін дамытуға бағытталған этноауыл іске қосылды. Бүгінде бұл жоба аудан тұрғындары мен өңір қонақтарына сапалы туристік қызмет ұсынып, ауыл экономикасына жаңа серпін беріп отыр. Жоба «Ауыл аманаты» бағдарламасы аясында қолдау тауып, кәсіпкер 8 млн теңге көлемінде жеңілдетілген қаржыға қол жеткізген.
Бөлінген қаражат есебінен пони мен жылқылар сатып алынып, этностильде безендірілген екі киіз үй жабдықталды. Сонымен қатар келушілерге ұлттық тағамдар ұсынылып, қазақ халқының тұрмыс-тіршілігімен және мәдени мұрасымен танысуға мүмкіндік жасалған. Бұл бастама ауыл туризмін дамытумен қатар, ұлттық құндылықтарды кеңінен насихаттауға жол ашып отыр.
Бүгінде этноауыл өңір тұрғындары мен туристер үшін тартымды демалыс орнына айналды. Келушілер табиғат аясында тынығып қана қоймай, атпен серуендеу, ұлттық дәстүрлермен танысу және қазақы болмысты сезіну мүмкіндігіне ие болды.
Кәсіпкер Назым Қыстаубаеваның айтуынша, «Ауыл аманаты» жобасы жеке кәсіпті кеңейтуге ғана емес, ұлттық мәдениетті дәріптеуге де зор мүмкіндік беріп отыр.
– ««AMANAT» партиясы жүзеге асырып отырған «Ауыл аманаты» жобасының арқасында кәсібімізді кеңейтіп, ұлттық мәдениетімізді туристерге кеңінен таныстыруға жол ашылды. Этноауыл ашу – көптен бергі арманымыз болатын. Бүгінде келушілер саны артып келеді. Алдағы уақытта қызмет түрлерін кеңейтіп, жаңа туристік бағыттарды іске қосуды жоспарлап отырмыз», – дейді кәсіпкер.
Айта кету керек, «AMANAT» партиясы ауыл кәсіпкерлігін дамыту, жаңа жұмыс орындарын ашу және өңірлердің экономикалық әлеуетін арттыру бағытындағы жүйелі жұмыстарды жалғастыра береді. «Ауыл аманаты» сынды жобалар ауыл тұрғындарының тұрмысын жақсартуға және шағын кәсіп иелерін тұрақты қолдауға бағытталған нәтижелі бастама.

2026 жылдың 28 мамырында Қазақстан Республикасы Мемлекеттік қызмет істері агенттігінің Шығыс Қазақстан облысы бойынша департаменті мен Қазақстан-Американдық еркін университеті арасында өзара ынтымақтастық туралы меморандумға қол қойылды.

Құжаттың негізгі мақсаты — университет түлектерін мемлекеттік қызметке тарту, жастар арасында мемлекеттік қызметтің беделін арттыру, сондай-ақ білім алушылар мен профессорлық-оқытушылық құрам арасында сыбайлас жемқорлыққа қарсы мәдениетті, сыбайлас жемқорлыққа қарсы сананы және академиялық адалдық қағидаттарын қалыптастыру бағытындағы өзара іс-қимылды дамыту.

Меморандумға қол қою мемлекеттік органдар мен жоғары оқу орындары арасындағы ынтымақтастықты нығайтудағы маңызды қадам болды. Бұл өзара іс-қимыл жастардың кәсіби тұрғыдан өзін-өзі дамытуына қосымша мүмкіндіктер жасауға, студенттердің мемлекеттік қызметке деген қызығушылығын арттыруға, сондай-ақ тиімді, кәсіби және адал мемлекеттік аппаратты қалыптастыруға үлес қосуға мүмкіндік береді деп күтілуде.

«Менің ойымша, жаңа технологияларды, әсіресе, жасанды интеллектіні сауда және логистика саласына белсенді енгізу аса маңызды.
 
Кедендік рәсімдерді жеделдету мақсатында ұлттық цифрлық жүйелердің байланысын күшейткен жөн.
 
Бұл нақты уақыт режимінде барлық құжатты тез өңдеуге, кедергілерді анықтауға және жүк ағындарын болжауға мүмкіндік береді.
 
Электрондық цифрлық қолтаңбаны өзара тану бизнес шығындарын айтарлықтай азайтып, ЕАЭО кеңістігіндегі алыс-берісті арттыруға көмектеседі.
 
Өнеркәсіп кооперациясын кеңейтуде жасанды интеллектінің сараптамалық әлеуетін пайдаланудың практикалық маңызы зор.
 
Елдеріміздің азық-түлік қауіпсіздігін нығайту үшін агроөнеркәсіп кешеніне интеллектуалды жүйелерді енгізуге басымдық беру қажет».

Бас прокуратураның Құқықтық статистика және арнайы есепке алу комитеті базасында құрылған Қылмыстық қауіптерді болжау орталығы үлкен деректерді, ведомствоаралық ақпарат алмасуды және жасанды интеллект құралдарын пайдалану арқылы сыртқы және ішкі қауіптердің алдын алу жөніндегі ұсынымдар қамтылған 192 ақпараттық хатты мемлекеттік органдарға жолдады.

38 алаяқтық интернет-ресурс бұғатталды. Сонымен қатар бұқаралық ақпарат құралдары арқылы халыққа алаяқтықтың жаңа тәсілдері мен сақтық шаралары жөнінде тұрақты түрде ақпарат берілуде – азаматтарға арналған 16 ескерту жарияланды.

Орталық енгізген шешімдердің қатарында медиакеңістік пен интернет-алаяқтықтарды мониторингтеу жүйелері, «e-Өтініш» жүйесіндегі азаматтардың өтініштерін талдау, сондай-ақ көшедегі және қайталама қылмыстылықты болжау модельдері бар.

Сонымен қатар Бас прокуратура Ішкі істер министрлігімен бірлесіп қылмыстық істерді тергеу процесіне жасанды интеллект енгізу жобасын іске асыруда.

Пилоттық жоба Астана қаласы мен Ақмола облысының бірқатар полиция бөлімшелерінде жүзеге асырылуда. Жоба аясында тергеуді жоспарлау, жауаптарды транскрипциялау және талдау, сондай-ақ процестік құжаттарды автоматты түрде қалыптастыру модульдері енгізілді.

Жалпы, «Цифрлық көмекші» модульдері арқылы 231 тергеу жоспары, 72 жауап алу хаттамасы, 65 айыптау актісі және қылмысты саралау туралы 15 қаулы қалыптастырылды.

Құқық қорғау саласындағы цифрлық құралдарды дамыту Мемлекет басшысы жариялаған Цифрландыру және жасанды интеллект жылы аясында жүзеге асырылуда. Президент Қ.К. Тоқаев атап өткендей: «Қазақстан цифрлық ел болуды кездеп отыр. Бұл – еліміздің алдында тұрған стратегиялық мақсат».

Бас прокуратура «Заң мен тәртіп» қағидаттарын нығайту, қоғамдық қауіпсіздік деңгейін арттыру және тиімді «Халық үніне құлақ асатын мемлекет» құру мақсатында цифрлық шешімдерді дамыту жұмысын жалғастырады.

Бүгін Шығыс Қазақстан облысының әкімі Нұрымбет Сақтағанов Зайсан ауданындағы әуежай құрылысының барысымен танысты. Сол жерде 300-ден астам адам жұмыс істеп жатыр. Бас мердігер - «ЭЛХОН СТРОЙ» ЖШС. Қазіргі таңда әуежай құрылысы 75 пайызға аяқталған.

Әуеайлақтың негізгі бөлігі — ұшу-қону жолағы, перрон және рульдеу жолы толық салынды. Аэродром аумағындағы дренаж жүйелері мен инженерлік коммуникациялардың құрылысы да аяқталды. Қазіргі уақытта терминал, апаттық-құтқару қызметі ғимараты, гараждар және жанар-жағармай сақтау қоймаларын салу жұмыстары жүргізілуде. Шілде айында сынақ рейсі жүзеге асырылмақ. Ұшу-қону жолағының ұзындығы 2200 метр, аэровокзалдың жалпы аумағы 4000 шаршы метр болады.

️Нұрымбет Сақтағанов өз сөзінде бірінші кезекте құрылыс сапасына мән беру керектігін жеткізіп, барлық жұмысты уақтылы аяқтау міндетін қойды. Айта кетейік, әуежай іске қосылғаннан кейін Қытайдың Үрімші қаласына, Алтай аймағына және Қанас көліне халықаралық рейстер ашу жоспарланып отыр. Сонымен қатар Астана, Алматы және Өскемен қалаларына ішкі бағыттар бойынша әуе қатынасы жолға қойылады. Әуежай Bombardier Q400, ATR-72 секілді өңірлік санаттағы әуе кемелерін қабылдайтын болады.