Самар ауданында кәсіпкерлерді мемлекеттік қолдау мәселелері бойынша кездесу өтті

Бүгін Самар ауданында кәсіпкерлер мен аудан тұрғындарының қатысуымен қаржы институттары мен бизнесті қолдау ұйымдарының өкілдерімен кездесу өтті.

Іс-шара барысында мамандар кәсіпкерлікті мемлекеттік қолдаудың қолданыстағы тетіктері, жеңілдетілген несиелеу бағдарламалары, несиеге кепілдік беру, гранттық қаржыландыру және шағын және орта бизнесті дамытуға арналған мүмкіндіктер туралы жан-жақты ақпарат берді. Қатысушылар өздерін қызықтырған сұрақтарға жауап алып, бизнес-жобаларын жүзеге асыруға қажетті қаржылық қолдау тетіктері бойынша жеке кеңестер алды.

Кездесу барысында кәсіпкерлерге арналған тегін оқыту мүмкіндіктеріне ерекше назар аударылды. «Даму» кәсіпкерлікті дамыту қоры» АҚ өкілдері online.damu.kz платформасында қолжетімді «Іскер Аймақ» білім беру бағдарламасын таныстырды.

Бағдарлама аясында қаржы және құқықтық негіздер, маркетинг пен сату, команданы басқару, бизнесті цифрландыру, сондай-ақ салалық бағыттар бойынша тәжірибелік онлайн курстар ұсынылады. Жақын уақытта платформа жасанды интеллект, электрондық коммерция, мал шаруашылығы және басқа да сұранысқа ие бағыттардағы жаңа бағдарламалармен толықтырылады.

Оқыту тегін өткізіледі, қазақ және орыс тілдерінде қолжетімді және Қазақстанның барлық өңірлерінің тұрғындары қатыса алады. Курсты аяқтаған тыңдаушыларға сертификат беріледі.

Мұндай кездесулер кәсіпкерлерге мемлекеттік қолдау шаралары туралы өзекті ақпарат алуға, кәсіби білімдерін жетілдіруге және өз бизнесін дамытуға жаңа мүмкіндіктерді тиімді пайдалануға жол ашады.