Самар ауданында Мемлекеттік басқару академиясына түсу мәселелері талқыланды

Самар ауданында Қазақстан Республикасы Президентінің жанындағы Мемлекеттік басқару академиясының Шығыс Қазақстан облысы бойынша филиалының директоры Жанар Буканованың қатысуымен кездесу өтті.
Өз сөзінде спикер 2026 жылғы 1 сәуірден бастап Қазақстан Республикасы Президентінің жанындағы Мемлекеттік басқару академиясына құжат қабылдау басталғанын хабарлады. Өтінімдер «Admission» ақпараттық жүйесі арқылы онлайн форматта қабылданып, 1 маусымға дейін жалғасады.
Ағымдағы жылы білім беру гранттарының саны артқаны атап өтілді: магистратураға 120-дан 200-ге дейін ұлғайтылып, докторантураға 12 грант қарастырылған. Сонымен қатар, талапкерлерге қойылатын талаптар күшейтілді. Атап айтқанда, басшылық лауазымдардағы жұмыс өтіліне қойылатын талап өсіп, енді ол кемінде үш жыл болуы тиіс. Кейбір білім беру бағдарламалары бойынша жалпы еңбек өтілі бес жылға дейін жетуі қажет.
Бұдан бөлек, білім беру бағдарламаларының тізімі кеңейтіліп, олардың саны 14-ке дейін артты. «Мемлекеттік саясат» мамандығына түсу үшін шет тілін меңгергенін растайтын сертификаттың болуы, сондай-ақ мемлекеттік тілді В1 деңгейінен төмен емес деңгейде білу міндетті талап ретінде енгізілді.
Білім алушыларға магистратурада күндізгі және сырттай оқу мүмкіндігі беріледі. Сонымен қатар, лауазымдық жалақы мөлшерінде шәкіртақы төлеу, жатақханамен қамтамасыз ету және оқу кезеңінде жұмыс орнын сақтау қарастырылған. Оқу қорытындысы бойынша түлектерге Академияның мемлекеттік үлгідегі дипломы табысталып, шетелде білімін жалғастыру мүмкіндігі ұсынылады.
Кездесу соңында Жанар Буканова Самар ауданының мемлекеттік қызметшілерінің сұрақтарына жауап берді.