Самар ауданы әкімдігінде құқық бұзушылықтардың алдын алу мәселелері талқыланды

2026 жылғы 23 қаңтарда Самар ауданында аудан әкімі Серік Жеңісовтің төрағалығымен әкімдік пен құқық қорғау органдарының бірлескен кеңесі өтті. Кездесу «Құқықтық сағат» форматында ұйымдастырылып, құқық бұзушылықтардың алдын алу мәселелеріне арналды.

Кеңес жұмысына Самар ауданының прокуроры Әділет Қуандықов пен аудандық полиция бөлімінің бастығының орынбасары, полиция подполковнигі Дулат Калиякперов қатысты. Сондай-ақ мемлекеттік мекемелердің басшылары, жергілікті атқарушы және өкілді органдардың өкілдері, ауылдық округтердің әкімдері және аудан әкімі аппаратының мемлекеттік қызметшілері болды.

Кездесу барысында Қазақстан Республикасының Президенті Қасым-Жомарт Тоқаев Ұлттық құрылтайдың жуырдағы отырысында заң мен тәртіптің маңызын ерекше атап өткендігі айтылды. Мемлекет басшысы олардың елдегі тұрақтылықтың, қоғамдық қауіпсіздіктің және азаматтардың мемлекетке деген сенімінің негізі екенін атап өтті.

Құқық қорғау органдарының өкілдері аудан бойынша қазіргі ахуал туралы ақпарат беріп, заңдылықтың сақталуы көп жағдайда басшылар мен мемлекеттік қызметшілердің жұмысына байланысты екенін еске салды. Сонымен қатар, жыл басынан бері аудан аумағында мемлекеттік қызметтің жекелеген өкілдері тарапынан заң мен тәртіп талаптарының сақталмау фактілері тіркелгені атап өтілді. Анықталған барлық фактілер бойынша тиісті шаралар қабылдануда.

Кеңес барысында құқық бұзушылықтардың алдын алуға қатысты өзекті мәселелер мен оларды болдырмаудың практикалық шаралары талқыланды. Құқық қорғау органдары мемлекеттік қызметшілерді профилактикалық жұмысқа белсенді қатысуға, халықпен тығыз байланыс орнатуға және қоғамдық қауіпсіздікті қамтамасыз етуге жеке үлес қосуға, оның ішінде интернет-алаяқтыққа қарсы іс-қимыл бағытында жұмысты күшейтуге шақырды.

Кездесуді қорытындылай келе, Самар ауданының әкімі Серік Жеңісов:
«Халықтың мемлекетке деген сенімі ең алдымен заңдылық пен тәртіптің сақталуына байланысты қалыптасады. Барлық мемлекеттік қызметшілер, әкімдіктер мен өзге де мемлекеттік құрылымдардың қызметкерлері заңды қатаң сақтап қана қоймай, жеке үлгісімен құқықтық тәртіп мәдениетін және заңға құрметті насихаттауы тиіс», — деп атап өтті.

Кеңес қорытындысы бойынша ақпараттық-түсіндіру жұмыстарын күшейту туралы уағдаластыққа қол жеткізілді. Жоспарланған шаралар қатарында құқықтық сағаттар мен дәрістер өткізу, сондай-ақ тұрғындар мен мекеме қызметкерлерін заңнама талаптары және оны бұзғаны үшін көзделген жауапкершілік туралы ақпараттандыру бар.