Өскеменде «Көктем Жеңісі» көшпелі концерті өтті

Өскемен қаласында патриоттық «Көктем Жеңісі» атты көшпелі концерт өтті. Іс-шара аясында Кеңес Одағының Батырларына арналған театрландырылған көріністер ұсынылды.

⚡️Төрт безендірілген автокөліктен құралған мерекелік шеру Әлия Молдағұлова атындағы көшеден басталды. Қатысушылар Ызғұтты Айтыков ескерткішіне және Владимир Мызы көшесіне аялдап, гүл шоқтарын қою рәсімін өткізіп, шағын концерттер ұйымдастырды.

⚡️Маршруттың соңғы нүктесі қалалық Арбат болды. Мұнда Сағадат Нұрмағамбетов, Қасым Қайсенов және Төлеген Тоқтаров есімдерімен аталатын көшелердің батырларын еске алуға арналған шара өтті.

Шеру бойы қала тұрғындары мен қонақтарына шығармашылық ұжымдар өнер көрсетті, әскери-патриоттық әндер шырқалды, театрландырылған қойылымдар ұсынылды. Іс-шараға оқушылар, әртістер және жастар ұйымдарының өкілдері қатысты.

Іс-шараның басты мақсаты – қаланың көше атауларында мәңгі сақталған батыр жерлестеріміздің ерлігін еске салып, жас ұрпақтың бойында отансүйгіштік рухты қалыптастыру болды.