Өскеменде аула командалары арасында мини-футболдан турнир өтуде

Өскемен қаласында 1 маусым – Халықаралық балаларды қорғау күніне орай аула командалары арасында мини-футболдан турнир басталды. Жарысқа 2011–2013 жылдары туған жас футболшылар қатысуда.

27-31 мамыр аралығында қала аудандарынан келген командалар финалға шығу үшін өзара бақ сынайды. Шешуші ойындар 1 маусым күні өтеді. Биыл турнирге жалпы саны 17 команда қатысуда.

Жеңімпаздар мен жүлдегерлерге дипломдар, медальдар және естелік сыйлықтар табысталады. Сонымен қатар, турнир қорытындысы бойынша қалалық әкімдік тарапынан аула спортына қолдау ретінде футбол доптары мен қақпа торлары беріледі.

Турнирдің негізгі мақсаты – салауатты өмір салтын насихаттау, бұқаралық балалар спортын дамыту, командада жұмыс істеу қабілетін қалыптастыру және жазғы демалыс кезінде балалардың бос уақытын тиімді ұйымдастыру.