Шекарашылар күні

       Бүгінгі Шекарашылар күні мерекесіне орай аудан әкімі Кемешев Рүстембек Набиолдаұлы Марқакөл ауылында орналасқан шекарашы сарбаздарды кәсіби мерекелерімен құттықтады.

       Әкім өз құттықтауында: «Сіздердің қажырлы қызметтеріңіздің арқасында халқымыз бейбіт өмір сүріп, еліміз дамып келеді. Отан алдындағы адал қызмет — ең үлкен ерлік. Біз әрқашан шекара күзетінде тұрған азаматтарымызды мақтан тұтамыз», – деп атап өтті.

       Мерекелік кездесуде сарбаздарға алғыс хаттар мен естелік сыйлықтар табысталды. Шараға аудандық мәслихат төрағасы Қалелов Мамырбек Жәлімханұлы және Марқакөл ауданының ТЖ бөлімінің бастығы, азаматтық қорғау майоры Тұржанов Елдар Ғалелұлы да қатысып, шекарашыларға өз құттықтау тілектерін жеткізді. Әкімдік өкілдері әскери бөлімшенің қызмет ету және тұрмыстық жағдайымен танысып, сарбаздардың күнделікті еңбегіне ерекше назар аударды.
       Шекара күзетінде тұрған сарбаздардың елге адалдығы мен қайсарлығы — барша халық үшін патриотизмнің жарқын үлгісі.