Сыбайлас жемқорлыққа қарсы іс-қимыл мәселелері бойынша V Республикалық кәсіпкерлер форумы

Сыбайлас жемқорлыққа қарсы іс-қимыл мәселелері бойынша V Республикалық кәсіпкерлер форумы

М. Ахметжанов: «Біздің басты міндетіміз – салдармен күресу емес, себебін жою» .
А.ж. 4 маусымда Нұр-сұлтан қаласында ҚР Сыбайлас жемқорлыққа қарсы іс-қимыл агенттігі мен «Атамекен» Ұлттық Кәсіпкерлер Палатасының ұйымдастыруымен сыбайлас жемқорлыққа қарсы іс-қимыл мәселелері бойынша V Республикалық кәсіпкерлер форумы өтті.
Форумды ашқан модератор - Қазақстан кәсіпкерлерінің құқықтарын қорғау жөніндегі уәкіл Р.Жүрсінов мемлекет пен бизнестің тығыз өзара іс-қимылы үшін осындай алаңдарды өткізудің маңыздылығын атап өтті.
Форумға қатысушыларға ҚР Сыбайлас жемқорлыққа қарсы іс-қимыл агенттігінің төрағасы М.Ахметжанов және «Атамекен» ҰКП Төралқа Төрағасы Т. Құлыбаев құттықтау сөз сөйледі.
«Атамекен» ҰКП Төралқа Төрағасы өз сөзінде Ұлттық палатаның Үкіметпен бірлесіп «Бизнеске арналған үкімет» құру бойынша жүргізіп жатқан жұмыстары туралы айтып берді. «Цифрлық даму министрлігімен бірлескен жұмыс туралы келісімге қол жеткізілді, «Зерде» холдингінің қатысуымен бірлескен команда құрылды. Қазір 20-ға жуық ұйым бизнеске 570-тен астам мемлекеттік қызметтер мен мемлекеттік қолдау шараларын ұсынады. Олар бытыраңқы, ортақ және жүйелі кооперация жоқ. Біз ең қажетті қызметтердің толық реинжинирингін өткіземіз, оларды оңтайландырамыз және композитті етеміз, бірыңғай цифрлық алаңға орналастырамыз», – деп атап өтті Т.Құлыбаев.
Форум барысында Антикор басшысының бірінші орынбасары О.Бектенов Сыбайлас жемқорлыққа қарсы іс-қимыл агенттігі мен «Атамекен» ҰКП арасындағы ынтымақтастық туралы келісімді іске асыру бойынша 2020 жылға арналған Жол картасының орындалуының негізгі қорытындыларын жариялады.
Оның айтуынша, Агенттік «Атамекен» ҰКП-мен бірлесіп Энергетика министрлігінде, Қаржы министрлігінің Ішкі мемлекеттік аудит комитетінде, Денсаулық сақтау министрлігінің Санитарлық-эпидемиологиялық бақылау, Медициналық және фармацевтикалық бақылау комитеттерінде, сондай-ақ Алматы және Түркістан облыстарының әкімдіктерінде сыбайлас жемқорлық тәуекелдеріне талдау жүргізді.
Сонымен қатар, ол сегіз салада: жер қатынастары, құрылыс, АӨК және тамақ өнеркәсібіндегі қолдау, ӘКК қызметі, экологиялық реттеу, кәсіпкерлерге субсидиялар беру, білім беру гранттарын бөлу және авторлық құқық салаларында жүзеге асырылған сыбайлас жемқорлыққа қарсы мониторингтің қорытындылары туралы хабарлады.
«Әрбір жұмыс блогының аяқталуы бойынша нақты ұсыныстар әзірленіп, оларды жүзеге асыру бойынша шаралар қабылданды», – деді Олжас Бектенов.
ҚР Сыбайлас жемқорлыққа қарсы іс-қимыл агенттігінің Төрағасы М.Ахметжанов өзінің қорытынды сөзінде бизнесті қорғау Антикор жұмысының басым бағыттарының бірі болып табылатынын атап өтті.
Осы тұрғыда ол Агенттік құрылымына қатысты жоспарланған қайта ұйымдастыру туралы егжей-тегжейлі айтып берді. «Заң бойынша бізге үш негізгі функция жүктелген. Осыған орай өз құрылымызды өзгертеміз. Көптеген департаменттерден біз негізгі үш қызметті жасаймыз – превенция, анықтау және тергеу. Біз осы үш блоктың өзара сапалы іс – қимылын қамтамасыз етуіміз керек, бірақ ең бастысы – превенция», - деп атап өтті М.Ахметжанов.
Сондай – ақ, Агенттік Төрағасы ведомство жұмысы «клиенттердің» - қоғам, бизнес, мемлекеттік органдардың қажеттіліктеріне бағдарланатынын атап өтті.
«Сыбайлас жемқорлықты жою бойынша тиісті шаралар қабылдамағандардан сұранысты қатайтатын боламыз. Өткен жылдың қорытындылары сыбайлас жемқорлық тәуекелдерінің 90% біздің сыртқы талдауларымызбен анықталатынын көрсетті», - деді Антикор басшысы.
Форум барысында Үкімет мүшелері мен Парламент депутаттары да сөз сөйледі.