Қазақстанда ауылдық округ әкімдерін сайлау қалай өтеді

ОСК аудандық маңызы бар қалалар, ауылдар әкімдерінің сайлауын дайындау және өткізу жөніндегі негізгі іс-шаралардың үлгілік күнтізбелік жоспарын бекітті. "Елімізде барлығы 2346 әкім бар. Жаңа нормалар енгізілгеннен кейін олардың барлығы бұрын ұсынылған қолданыстағы өкілеттік мерзімі аяқталғаннан кейін тікелей дауыс беру арқылы сайланады. Ағымдағы жылдың соңына дейін аталған санаттағы 775 әкімді сайлау жоспарлануда. Осылайша, азаматтардың тікелей сайлау арқылы мемлекетті басқаруға қатысуын кеңейту қағидаты дәйекті түрде іске асырылуда", - деді ОСК басшысының орынбасары Константин Петров отырыс барысында "Сайлау заңнамасына сәйкес сайлауды аумақтық сайлау комиссиялары кемінде 40 күн бұрын тағайындайды және қолданыстағы әкімнің өкілеттік мерзімі аяқталғанға дейін кемінде 10 күн бұрын өткізеді. Әкімнің өкілеттігі мерзімінен бұрын тоқтатылған жағдайда сайлау бір ай ішінде тағайындалады және олар тағайындалған күннен бастап бір ай мерзімде өткізіледі. Кандидаттарды ұсыну сайлау тағайындалған күннен кейінгі күннен басталады және сайлау өткізілетін күнге дейін он бес күн бұрын жергілікті уақыт бойынша сағат он сегізде аяқталады", - деді ол. Сонымен қатар, ол кандидаттар келесі жолдармен ұсынылуы мүмкін екенін атап өтті: Саяси партиялар өз мүшелерінің арасынан. Бұл ретте саяси партия бір сайлау округінде бір ғана кандидат ұсынуға құқылы; дауыс беруге құқығы бар тиісті округ сайлаушыларының жалпы санының кемінде 1 пайызына қол жинауды қамтамасыз ете отырып, өзін-өзі ұсыну арқылы. егер ұсыну аяқталған күнге екіден аз кандидат ұсынылса, ауданның (облыстық маңызы бар қаланың) әкімі. Оның айтуынша, аудандық маңызы бар қаланың, ауылдың, кенттің, ауылдық округтің әкімі болып сайлау үшін ел азаматы кемінде 25 жаста болуы, әрекетке қабілетті болуы, Мемлекеттік қызмет саласындағы заңнаманың талаптарына сәйкес келуі, соттылығы және заңда белгіленген тәртіппен танылған сыбайлас жемқорлық қылмыс, сыбайлас жемқорлық құқық бұзушылық жасау фактісі болмауы тиіс. "Аудандық маңызы бар қала, ауыл, кент, ауылдық округ әкімдеріне кандидат өзін-өзі ұсынған жағдайда дауыс беруге құқығы бар тиісті сайлау округі сайлаушыларының жалпы санының кемінде бір пайызы қолдауға тиіс. Сайлаушыларды қолдау олардың қолдарын жинаумен куәландырылады. Кандидаттарды тіркеу барлық қажетті құжаттарды алғаннан кейін басталады және сайлау күніне 10 күн қалғанда жергілікті уақыт бойынша сағат он сегізде аяқталады. Кандидаттардың сайлау алдындағы үгіті кандидаттарды тіркеу мерзімі аяқталған сәттен басталады, яғни сайлау күніне 10 күн қалғанда және сайлау күнінің алдындағы күннің жергілікті уақыты бойынша нөл сағатта аяқталады", - деп толықтырды Еран Дауылбаев. Оның айтуынша, сайлау қорытындысын ауданның (қаланың) аумақтық сайлау комиссиясы үш күн ішінде белгілейді. Аудандық маңызы бар қаланың, ауылдың, кенттің, ауылдық округтің әкімі болып басқа кандидаттармен салыстырғанда дауыс беруге қатысқан сайлаушылардың көп дауысын жинаған кандидат сайланды деп есептеледі. Ауданның (қаланың) аумақтық сайлау комиссиялары жеті күн ішінде сайланған әкімді тіркеуді жүзеге асырады. Сайланған әкімнің өкілеттігі оны тиісті аумақтық сайлау комиссиясы тіркеген кезден басталады деп хабарланады.