ОНКОЛОГИЯЛЫҚ ҚЫЗМЕТТІҢ ЖЕТІСТІКТЕРІ МЕН МӘСЕЛЕЛЕРІ ОБЛЫСТЫҚ ҮЙЛЕСТІРУ КЕҢЕСІНДЕ ТАЛҚЫЛАНДЫ

Үйлестіру кеңесінің отырысына қалалық және аудандық клиникалардың онкологтары, облыстың бас штаттан тыс дәрігерлері, Шығыс Қазақстан өңіріндегі бастапқы медициналық-санитарлық көмек ұйымдарының басшылары қатысты.

ШҚО-ның бас штаттан тыс онкологы, облыстық онкология орталығының директоры Гульмира Сагидуллина 2025 жылдың І тоқсанындағы онкологиялық қызметтің қорытындылары туралы баяндама жасады.

Оның айтуынша, бұл кезеңде қатерлі ісік аурушаңдығы 9,6%-ға артқан, ал өлім-жітім деңгейі 1,1%-ға төмендеген. Ауру себептері тізімінде скрининг жүргізілетін қатерлі ісік түрлері – сүт безі, өкпе және колоректалды қатерлі ісік – алдыңғы қатарда тұр.

Онкологиялық дертпен есепте тұрғандар саны – 14 668 адам. Жылдың алғашқы үш айында 585 жаңа қатерлі ісік жағдайы анықталды. Бұл өткен жылдың сәйкес кезеңімен салыстырғанда 13 жағдайға артық.

– Қазіргі таңда ШҚО-да колоректалды қатерлі ісікке скрининг жүргізу деңгейі бойынша «қызыл аймақта» тұр, – деді Гүлмира Сағидоллина. – Бірінші кезеңнің тиімділігі тікелей пациенттерге материалды дұрыс жинау тәртібін түсіндіруге байланысты. Ал екінші кезеңге келсек – эндоскопиялық орталық ашылып, жұмыс істеп жатыр, науқастарды жолдаңыздар.

Сүт бездеріне скрининг жүргізу де тереңірек қарауды қажет етеді. Маммографиялық құрылғылармен қамтамасыз етілу деңгейі жақсы – Өскемен қаласында әрбір дерлік емханада бірнеше аппарат бар, сондай-ақ аудандық ауруханалардың көбінде бұл құрылғылар бар, жоқ жерлерде – биыл орнатылады.

Бас онколог ең көп анықталған асқынған жағдайлар жасы 65-тен асқан науқастар арасында екенін атап өтті.

– Осы жастағы адамдарға ерекше назар аударыңыздар, оларды скринингтен өткізіңіздер, – деді ол облыстың қала-аудандарындағы дәрігерлерге. – Ерте диагностика көрсеткіштерін тек осылай жақсартамыз.

Сондай-ақ спикер медициналық ұйымдар басшыларына арналған бағалау индикаторлары туралы айтып, олардың формалды емес, медициналық көмектің сапасын бағалайтын нақты көрсеткіштер екенін атап өтті. Бұл көрсеткіштерге ПМСП ұйымдары мен Онкоорталық арасындағы өзара іс-қимыл да әсер етеді.

– Бізсіз сіздер науқастарды емдей алмайсыздар, сіздерсіз біз диагностикамен толық қамти алмаймыз, – деді Гульмира Сагидуллина. – Арамызда толық түсіністік орнады, өңір тұрғындарының игілігі үшін бірлесіп жұмыс істейміз.