Олжас Сүлейменовпен онлайн кездесу

Бүгін ҚР Ұлттық кітапханасының ұйымдастыруымен Қазақстанның Халық жазушысы, ақын, тілтанушы, саясаткер, Қазақстанның Еңбек Ері Олжас Омарұлы Сүлейменовтің 85 жасқа толу мерейтойына арналған «Заманынан биік Ақын» атты онлайн шығармашылық кездесу кеші өтіп, еліміздің барлық өңірлерінің кітапханалары ақынды мерейтойымен құттықтады.

Кітапхана қызметкерлері республикалық онлайн-кездесуге қатысып, Шығыс Қазақстан облысының атынан атақты ақынды мерейтойымен құттықтады.

Алаш жұртын әлемге танытқан қарымды қаламгер, қоғамдық-саяси маңызды оқиғаларға әділ ой-пікірін білдіріп отыратын, ел бірлігін сақтауға зор үлесін қосып келе жатқан қайсар тұлға  18 мамырда 85 жасқа толған болатын.

Кітапхана директорының орынбасары Меруерт Емельбаева мерейтой иесін тікелей эфирде құттықтап, барлық оқырмандар атынан алғысын білдірді. Ақынның өлеңдері әртүрлі тілдерде оқылып, С. Аманжолов атындағы ШҚМУ студенті Таңат Қасым жазушыға өз өлеңін арнады.

Олжас Сүлейменовке арнау

Ақыны ол қазақтың бетке ұстар,

Зеңгір аспан шырайлы көкке құштар.

Ядролық қаруға қарсы тұрған,

Бірінші адам емеспе көпке тұспал.

Жазушылық өлеңі басым көптен,

Сүлейменов шынымен асыл неткен.

Орыс тілді болсада жаны қазақ,

Ұлты үшін еңіреп жасын төккен.

Туылған күні болып кезі келіп,

Құттықтап бар алаштың сөзіне еріп.

Олжас Сүлейменов мың жасасын,

Жүре берсін көненің көзі болып.

Кітапхана оқырмандарына мерейтой иесіне арналған «Мың бір сөз» әдеби көрмесін ұсынады.

Олжас Сүлейменовтің алғашқы өлеңдері 1959 жылы танымал «Литературная газетада», ал «Арғымақтар» атты тұңғыш кітабы 1961 жылы жарық көрді. Алпысыншы жылдар ұрпағының өкілі ретінде О.Сүлейменов Роберт Рождественский, Андрей Вознесенский, Евгений Евтушенколармен жақын араласты. Сергей Довлатов та өзінің новеллалар жинағында Олжасты ерекше атап өтеді, ал Римма Казакова оған «Люблю тебя, товарищ мой Олжас» өлеңін арнады.

Көрмеде ақынның өмірбаяны, балалық шағы, студенттік жылдары, шығармашылық ізденістері жайлы естеліктер, әр жылдары жазылған өлеңдері берілген «Доброе время восхода», «Трансформация огня», «Мосты», «Қыш кітап», «Поэт красивым должен быть, как бог…», «Айналайын», «И в каждом слове улыбался бог…», «Шығармалар жинағы» кітаптары, және 1975 жылы алғаш рет басылып шыққан танымал «Аз и Я» зерттеу-шығармасы ұсынылған. БҰҰ-ның алты ресми тіліне аударылған «Антология современной казахской поэзии» басылымына ақынның таңдамалы шығармалары енген.

О. Сүлейменовтің өлеңдері мен поэмалары ағылшын, француз, неміс, испан, чех, поляк, словак, болгар, венгр, моңғол және түрік тілдеріне аударылған. Көрмеден оқырман қауым ақынның ағылшын тіліне аударылған «Язык письма. Взгляд в доисторию – о происхождении письменности и языка малого человечества» еңбегін таба алады.

Көптеген белгілі зерттеуші, әдебиеттанушы, сыншылар Олжас Сүлейменовтің шығармашылығына өз еңбектерін арнады. Г.М. Мутановтың редакциясымен жарық көрген «Өнегелі өмір» сериясы басылымында ақынның көпқырлы қасиеті жан-жақты талқыланса, С. Абдуллоның редакторлығымен шыққан «Феномен Олжаса» жинағына ақын мен оның шығармашылығына арналған мақалалар, эсселер мен өлеңдер енген. «Мир Олжаса Сулейменова» алыс шетелдердегі ақынның шығармаларына жазылған рецензиялар, ғылыми мақалалар мен сұхбаттарға шолу жасайды. Уақыт сынымен тексерілген жарты ғасырлық достық – бұл туралы журналист, жазушы Геннадий Толмачевтің «Повесть об Олжасе» кітабы сыр шертеді.

Олжас Омарұлының көзқарасы, пікірі, дүниетанымы жайлы «Беседы с Олжасом», «Литература – это жизнь», «Вместе с Олжасом» басылымдары баяндайды. «Солнечное утро Олжаса Сулейменова» еңбегінде ақын шығармаларына сыни көзқарас берілген.

«Адамзаттың ақыны» дәрежесіне көтерілген, мемлекет және қоғам қайраткері, Халық жазушысы, Қазақстанның Еңбек Ері Олжас Омарұлын мерейтойымен құттықтай отырып, барша оқырмандарымызды ақынның өмірі мен шығармашылығына арналған әдебиеттер көрмесімен танысуға шақырамыз.

 

Жансая Ашкенова
87076405870