«Мемлекеттік тіл – қоғамдық қатынас тілі: көрнекі ақпарат пен жарнама тілін біріздендіру. Қоғамдық тамақтану орындарындағы ас мәзір мәселесі» тақырыбындағы семинар-кеңес өтті

Шығыс Қазақстан облысының мәдениет басқармасының ұйымдастыруымен «Мемлекеттік тіл – қоғамдық қатынас тілі: көрнекі ақпарат пен жарнама тілін біріздендіру. Қоғамдық тамақтану орындарындағы ас мәзір мәселесі» тақырыбындағы семинар-кеңес өтті.
Шараның басты мақсаты – кәсіпкерлік ортада мемлекеттік тілді қолдану мәдениетін арттыру, деректемелер мен көрнекі ақпарат мәтіндерінің орфография нормаларын сақталуы, сауатты ресімделуін қамтамасыз ету, қоғамдық тамақтану орындарындағы ас мәзірінің мемлекеттік тілде дұрыс әрі толық ұсынылуын бақылау болып табылады.
Семинарға Халықаралық «Қазақ тілі» қоғамының ШҚО бойынша филиалының төрағасы, облыстық құқық қорғау органдарының, кәсіпкерлер палатасының, Сауда және тұтынушылардың құқықтарын қорғау департементінің, бұқаралық ақпарат құралдарының өкілдері, тіл мәселесіне жауапты бөлімдер қатысты.
Шара барысында қызмет көрсету орындарында мемлекеттік тілдің қолданылуы, тамақтану орындарындағы ас мәзірлерінің мемлекеттік тілде берілу мәселелері талқыланып, осы бағыттағы заңнамаға енгізілген өзгерістер түсіндірілді.
Осындай бағыттағы жұмыстар облыстың қала, аудандарында кезең-кезеңімен ұйымдастырылатын болады.