«Құқықтық сауаттылық: Конституцияны білесің бе?»

25 тамыз күні сағат 18:00-де Шығыс Қазақстан облыстық балалар және жасөспірімдер кітапханасында Қазақстан Республикасы Конституциясының 30 жылдығына арналған «Құқықтық сауаттылық: Конституцияны білесің бе?» атты этно-куиз өтті. Ата Заңымыздың мерейтойын атап өту барысында қатысушылар еліміздің тарихына, болашағына және әрбір азаматтың мемлекет дамуына қосатын үлесі мен атқаратын рөліне ой жүгіртуге мүмкіндік алды. Соңғы үш онжылдықта ҚР Конституциясы әрбір қазақстандықтың өмірінің ажырамас бөлігіне айналып, демократия, құқықтық мемлекет және әлеуметтік әділеттілік қағидаттарын бекітті.

Куиз барысында қатысушыларға жалпы құқық, мәдениет пен дәстүрге қатысты сұрақтар ұсынылып, олардың білімін нығайтуға, белсенділік танытуға және жаңа ақпарат алуға жол ашылды. Елдің негізгі заңын тереңірек түсіну – азаматтардың өзіне деген сенімділігін арттырып, қоғам дамуына жауапкершілікпен қарауға ықпал етті.

Ойын 8 тақырыптық турдан тұрды. Шара барысында қатысушылар еліміздің басты құжаты туралы маңызды мәліметтерді еске түсіріп қана қоймай, пікірлес ортада қызықты әрі нәтижелі уақыт өткізуге мүмкіндік алды.