«Орыс музейі – көркемдік Ресейге цифрлық жол сілтеуші» конференциясына қатысу

2024 жылғы 14-15 қарашада Санкт-Петербург қаласындағы Мемлекеттік Орыс музейінде «Орыс музейі – көркемдік Ресейге цифрлық жол сілтеуші» атты жыл сайынғы Халықаралық ғылыми-тәжірибелік конференция өтті. Конференция «Орыс музейі: виртуалды филиал» жобасы аясында ұйымдастырылды. Музей-қорықтың ақпараттық-ағарту бөлімінің меңгерушісі Ш.М. Кәрібаева «ШҚО этнографиялық музей-қорығының жұмыс тәжірибесі және «Орыс музейі: виртуалды филиал» жобасы аясындағы музейаралық ынтымақтастық» тақырыбында баяндама жасады.

 Конференцияға Ресейдегі және шетелдегі Орыс музейінің виртуалды филиалдарының қызметкерлері мен серіктестері, сондай-ақ өнер мен мәдениетті цифрлық технологиялар арқылы насихаттауға қызығушылық танытқан мәдениет, білім беру, медициналық, оңалту және рухани-ағарту орталықтарының өкілдері шақырылды.

 Конференцияның негізгі бағыттары:

- орыс музейінің цифрлық ресурстарын пайдалана отырып ағарту және білім беру іс-шараларын ұйымдастыру және өткізу: жаңа жұмыс формалары мен форматтары;

- музейлердің көркемдік топтамалары мен көрме қызметін зерттеу және танымал етуге арналған цифрлық ресурстарды құру (AR/VR-жобалар, 3D, бейне және мультимедиа, ойындар, қосымшалар, веб-сайттар);

- мультимедиялық көрмелерді ұйымдастыру және өткізу.

          Конференция аясында «Мәдени мұра нысаны проектор аясында» атты Халықаралық конференция жеке блок ретінде өтті. Онда инновациялық жарық және проекциялық жабдықтарды, сондай-ақ арнайы мультимедиялық контентті ресейлік және шетелдік мәдениет мекемелерінің заманауи мәдени қызметінде қолдану тәжірибесі ұсынылды.