Жамбыл облысында қой мен ешкінің шешек ауруына қарсы симуляциялық оқу-жаттығулары сәтті өтті

2025 жылдың 26-28 наурызы аралығында Жамбыл облысының Байзақ ауданында жануарлардың аса қауіпті ауруларының өршуін болдырмау және жою шараларын пысықтауға бағытталған симуляциялық оқу-жаттығулар өтті.

Оқу-жаттығуларды ҚР Ауыл шаруашылығы министрлігі Ветеринариялық бақылау және қадағалау комитетінің Жамбыл облыстық аумақтық инспекциясы ҚР Үкіметі мен Дүниежүзілік жануарлар денсаулығы ұйымы арасындағы келісімді іске асыру шеңберінде ұйымдастырды. 2025 жылы осындай оқу-жаттығулар елдің барлық облыстарында тұрақты негізде өтеді.

 Оқу-жаттығуларға 63 адам қатысты, оның ішінде ВБҚК облыстық, аудандық және қалалық аумақтық инспекцияларының басшылары мен қызметкерлері, Жамбыл облысының ветеринария басқармасы, республикалық эпизоотияға қарсы отрядтың Жамбыл филиалы, республикалық ветеринариялық зертхана, ветеринариялық станция, сондай-ақ аудандар мен қалалардың ветеринариялық бөлімдері және т.б. 20 техника бірлігі жұмылдырылды.

 Оқу-жаттығулар эпизоотиялық жағдайды және әрекет ету шараларын талдауды, ауру ошағын анықтау, оқшаулау және жою бойынша практикалық жаттығуды, сондай-ақ талқылаумен қорытындылауды қамтыды. Оқу-жаттығулар ветеринариялық қызметтердің қой мен ешкінің шешек ауруының өршуіне жедел әрекет етуге дайын екенін растады.

Әзірленген іс-қимыл алгоритмдері жұқтыру ошақтарын уақтылы анықтауға және оқшаулауға, мал шаруашылығы саласы үшін тәуекелдерді азайтуға және елдің эпизоотиялық жағдайын қамтамасыз етуге мүмкіндік береді.