Астанада ауыл шаруашылығы жануарларының етін заңсыз өңдейтін цех анықталды

Ветеринарлық бақылау және қадағалау комитетінің аумақтық инспекция мамандары полиция қызметкерлерімен бірлесіп Астанада ауыл шаруашылығы жануарларының етін заңсыз өңдейтін цехты анықтады.

Тексеру шаралары «Скотокрад» жедел-алдын алу акциясы аясында жүргізілді.

Тексеру барысында цехтың ауыл шаруашылығы жануарларының бастарынан алынған етті ветеринариялық-санитариялық қорытындысыз және есептік нөмірсіз өңдеп келгені белгілі болды.

Қарау кезінде инспекторлар жануарлардың бастарын, майды, қалдықтарды, сондай-ақ жалпы салмағы 3 тонна болатын дайын өнім салынған 180 қапты тәркілеп алды. Сондай-ақ цех ішінен ет өңдеуге арналған арнайы құрал-жабдықтар анықталды.

Цех қызметіне жауапты жеке тұлғаға әкімшілік айыппұл салынды. Заңсыз дайындалған барлық өнім қалалық полигонда өртеп жойылды.