ЖАС МЕМЛЕКЕТТІК ҚЫЗМЕТШІ

Мемлекеттік қызмет – қоғам өмірінде ерекше рөл атқарады. Мемлекеттік қызмет саласында жұмыс жасау – қоғам мен мемлекет тарапынан ерекше сенім білдіру болып табылады. Ал мемлекеттік қызметші болу – кәсібилікпен бірге жоғары адамгершілік қасиеттерге ие бола отырып елге қызмет ететін жауапты міндет.

Сондай жауапты міндетті сезіне білген Гүлсезім Қабиева мемлекеттік қызмет саласын таңдаған.

Гүлсезім Русланқызы 1998 жылдың 1 қаңтар күні Батыс Қазақстан облысында дүниеге келген.

2019 жылы Қ.Жұбанов атындағы Ақтөбе өңірлік мемлекеттік университетінің «Әлеуметтік педагогика және өзін-өзі тану» мамандығы бойынша бакалавр дәрежесіне ие болып, 2021 жылы осы жоғары оқу орнының «Мемлекеттік және жергілікті басқару» мамандығы экономика ғылымдарының магистрі атанды.

Өз еңбек жолын 2021 жылдың тамыз айында Орал қаласы әкімі аппаратында жастар практикасынан бастады.  Бұдан әрі  қоғамдық жұмыс бағдаламасы бойынша қызметті атқарып,  2023 жылдың тамыз айында конкурстық комиссияның оң қорытындысымен Орал қаласы әкімі аппаратының құжаттамалық қамтамасыз ету және өтініштер бөлімінің  бас маманы міндетін уақытша атқару үшін жұмысқа қабылданды.

 Мемлекеттік қызметке кіру кезінде Гүлсезім лауазымдық өкілеттіктерін және соған негізделген беделін, жеке басының, топтық және өзге де қызметтік емес мүдделерде пайдалануға алып келуі мүмкін әрекеттерді болғызбау мақсатында өзіне шектеулерді қабылдады. Сонымен қатар Қазақстан Республикасы мемлекеттік қызметшілерінің Әдеп кодексімен бекітілген қызметтік әдебінің стандарттарын сақтауға ерікті түрде келісті.

Жас маман Гүлсезім Қабиеваны өз қызметінде мемлекеттік саясатты ұстанып, қоғамның мемлекеттік қызметке сенімін сақтауға және нығайтуға ұмтылып,  өз міндеттері мен функцияларын заңға сәйкес барлық адал ниетімен құзыретті және тиімді түрде орындайтынын сенемін.