Қала әкімі ауыл шаруашылығы, тамақ және өңдеу өнеркәсібі саласында жемісті еңбек етіп жүрген жандарды өткен кәсіби мерекелерімен құттықтап, құрметін білдірді.
- Ауыл шаруашылығы - ел экономикасының маңызды салаларының бірі.
Халықтың әл-ауқаты мен өмір сапасының жақсы болуы ауыл шаруашылығының дамуымен тығыз байланысты. Сондықтан тұрғындар үшін ауыл шаруашылығының, оның өнімдерінің маңызы зор. Ал сіздер қиындыққа қарамай, талмай еңбек етіп жатырсыздар, - деді.
Шаһар басшысы қазіргі таңда біздің өңірімізден шығатын өнімдер тек облыс көлемінде ғана емес, республикалық деңгейде де сұранысқа ие екенін атап өтті.
- Бұл - сіздердің үлкен еңбектеріңіздің арқасында. Осынау мерейлі мерекелеріңізде дендеріңізге саулық, бастарыңызға амандық, баршаңызға толайым табыстар тілеймін, - деді Абат Абайұлы.
Шара барысында қала әкімі сала үздіктерінің басшыларын мерекелік алғыс хаттармен марапаттады.