«ТАЗА ҚАЗАҚСТАН» АКЦИЯСЫ АЯСЫНДА ҰЛЫТАУ ОБЛЫСЫНДА ЭКОЛОГИЯЛЫҚ ІС-ШАРАЛАР ӨТТІ

2025 жылдың 20 наурызында Ұлытау облысының барлық өңірлерінде «Таза Қазақстан» жалпыұлттық экологиялық бағдарламасы аясында түрлі бағыттағы экологиялық іс-шаралар өтті. Бұл бастаманың басты мақсаты – қоршаған ортаны таза ұстау, тұрғындардың экологиялық санасын арттыру және табиғатқа деген қамқорлықты насихаттау.

Ұлытау облысының орталығы Жезқазған қаласында «Жасыл желек» акциясы өтті. Белсенді жастар қаланың орталық бөлігіне ағаш отырғызды. Аталған іс-шара облыс орталығындағы экологиялық сананы арттыруға және табиғи ортаны жақсартуға бағытталған.

Сәтбаев қаласында «Жер – біздің ортақ үйіміз» викторинасы өтті. Викторинаға белсенді жастар, колледж студенттері, эковолонтерлер қатысты. Іс-шара қызықты ойын форматында өтті, онда қатысушылар экология, табиғат, климаттың өзгеруі және қоршаған ортаны сақтау тәсілдері туралы білімдерін тексерді. Қатысушылар әртүрлі сұрақтарға, интерактивті тапсырмаларға жауап берді және біздің планетамыз туралы танымдық фактілерді білді.

Жаңаарқа ауданының жастар ресурстық орталығында жастар арасында «Экосана-елдің өркендеуіне жол!» атты тұрақты даму, экологиялық мәдениет және саналы тұтыну мәселелеріне арналған дөңгелек үстел өтті.

Пікірталас барысында қатысушылар заманауи экологиялық трендтерді және олардың қоғамға әсерін, экосананы дамыту жөніндегі табысты бастамаларды қарастырды.

Қаражал қаласы мен Ұлытау ауданында «Таза бейсенбі» акциясы өтті, оған осы өңірлердің коммуналдық қызмет жұмыскерлері, бей-жай қарамайтын тұрғындар, белсенді жастар қатысты. «Таза бейсенбі» акциясы «Наурыз мейрамын» мерекелеуге дайындалуға орай өтті.

 «Таза Қазақстан» басталғалы бері жалпы саны 148 мыңнан аса адам, 1317 ұжым қатысты. Сондай-ақ, 1972 бірлік мамандандырылған техника жұмылдырылды, нәтижесінде 3457 тонна қоқыс шығарылды, 264 кәсіпорын мен 224 әлеуметтік нысан тартылды.