Әйелдер жамағатының зияткерлік ойыны

Қазақстан Республикасы Конституциясы күніне орай Сәтбаев пен Жезқазған қалаларының әйелдер мешіт жамағаты үшін ерекше форматтағы зияткерлік ойын ұйымдастырылды. Бұл танымдық шара әйелдердің білімін жетілдіру, құқықтық сауаттылығын арттыру және белсенді азаматтық ұстанымын қалыптастыруды көздейді.

Алғашқы ойында 20-ға жуық қатысушы болса, қазір олардың саны 40 адамға дейін жетті. Бұл – өңірдегі әйелдер жамағатының белсенділігінің артып келе жатқанын және танымдық іс-шаралардың беделге ие бола бастағанын көрсетеді.

Шара барысында қатысушыларға ғылыми, зияткерлік, пәндік сұрақтармен қатар діни сұрақтар да қойылды. Қатысушылар өз білімдерін сынап қана қоймай, тәжірибе алмасып, еркін пікір бөлісуге мүмкіндік алды.

Айта кетерлігі, ойынға Жезқазған және Сәтбаев қалаларының әйелдер жамағатының өкілдері белсене қатысты. Олардың ұйымшылдығы мен ынтасы шараның жоғары деңгейде өтуіне ықпал етті.

Жалпы, мұндай форматтағы зияткерлік ойындар өңірде төртінші рет ұйымдастырылып отыр және әйелдер мешіт жамағаты арасында тұрақты түрде беделге ие болуда.

Әйелдер жамағатының зияткерлік ойыны – Конституция күні секілді мемлекеттік мерекеге арналған тағылымды бастама ғана емес, қоғамда білім мен бірлікті дәріптейтін маңызды алаң болып отыр.