ХАЛЫҚТЫҢ ӨТІНІШІ, СҰРАНЫСЫ - БАСТЫ НАЗАРДА
Төлеби ауданының әкімі Еркеғали Әлімқұловтың аудан тұрғындарымен кезекті он екінші кездесуі Зертас ауылдық округінде жалғасын тапты.
Аудан әкімі округ аумағында 2024 жылы атқарылған жұмыстар мен жүзеге асатын жобаларды таныстырды.
2024 жылы 5 әлеуметтік нысанға 247 млн.теңге қарастырылып, тиісті жұмыстар атқарылды.
Атап айтқанда: Зертас елді мекеніндегі фельдшерлік-акушерлік пункті, Жаңакүш елді мекенінің ауыз су құбыры құрылысы аяқталып, пайдалануға берілді.Зертас елді мекенінің жаңа массивіне инженерлік коммуникация жүйелері тартылуда. Осы аталған елді мекеннің Ж.Қасымбеков және Құрманғазы көшелерінің 3,2 шақырымы жарықтандырылды. Зертас ауылдық округі әкімі аппараты ғимараты ағымдағы жөндеуден өтті.
2025 жылы 4 жобаға 147 млн.теңге қарастырылды. Атап айтқанда: «Ауыл-Ел бесігі» жобасы аясында Жаңакүш елді мекеннің орталық көшесінің 2,8 шақырымын орташа жөндеуден өтсе, Зертас елді мекенінің 8 көшесіне түнгі жарық шамдары қойылады. Су мұнарасын ағымдағы жөндеу жұмыстарына, елдi мекеннің орталығына СЕРГЕК бейнебақылау жүйесін орнатуға қаржы қарастырылды.
Ауылдық округтерге көшпелі кездесуде халықтың мұң-мұқтажын тыңдап, ұсыныс өтінімдерін назарға алу мақсатында арнайы келдік. Елдің дамуына үлес қосу үшін кез келген проблеманы ашық айтуларыңызды сұранамын,— деді аудан әкімі Еркеғали Амантайұлы.
Кездесуде округ халқы спорт кешенінің құрылыс жұмыстарына қаржы бөлуді, жаңа массивке инфрақұрылым жүргізу, интернет сапасын жақсартуды сұранды. Ауыз су құбырының жиі жарылуына шағымданып, мәселені шешуге көмек сұрады.Аудан әкімі Еркеғали Амантайұлы тұрғындардың көкейлерінде мазалаған сұрақтар мен туындаған мәселелерді шешу бағытындағы жұмыстар жалғасын табатынын айтып, сала басшыларына нақты тапсырмалар жүктеді.
Азаматтардың барлық сындарлы өтініш-тілектерін жедел әрі тиімді қарастыратын «Халық үніне құлақ асатын мемлекет» тұжырымдамасын іске асыру – бәрімізге ортақ міндет. Аудан әкімінің халықпен кездесуі, жеке қабылдаулары тұрақты түрде жүргізіледі.
Төлеби ауданы әкімінің баспасөз қызметі