АШЫҚ ДИАЛОГ – НАҚТЫ ШЕШІМ: АУДАН ӘКІМІНІҢ ҚАБЫЛДАУЫ ӨТТІ

Аудан әкімі Еркеғали Әлімқұлов «AMANAT» партиясы Төлеби аудандық филиалының атқарушы хатшысы Шырынбек Оңғаровпен тұрғындарды жеке мәселелері бойынша қабылдады. Қабылдау ашық әрі еркін форматта өтіп, әрбір азамат өз өтінішін тікелей аудан басшысына жеткізуге мүмкіндік алды.

 

Қабылдау барысында тұрғын үйді жекешелендіру, жеке жер учаскелерінің құжаттарын реттеу, жер құжаттарын заңдастыру, тұрғын үй кезегіне тұру және кезекті реттеу, әлеуметтік бір реттік жәрдемақы алу мәселелері кеңінен талқыланды. Сонымен қатар, жер құжаттарын электронды базаға енгізіп, тиісті қаулы дайындау бойынша туындаған мәселелер де көтерілді. Әрбір сұрақ заң аясында қаралып, нақты түсіндірмелер берілді.

 

Аудан әкімі ашық диалогтың нәтижелі болуы басты назарда екенін атап өтіп, бірде-бір мәселе ескерусіз қалмайтынын жеткізді. Қабылдау барысында бірқатар өтініштер сол жерде оң шешімін тапты. Ал қосымша зерделеуді қажет ететін мәселелер бойынша жауапты бөлім басшыларына нақты тапсырмалар жүктеліп, орындалуы бақылауға алынды.

 

Айта кетейік, өңір тұрғындарын жеке қабылдау тұрақты түрде жалғасады. Аудан әкімі мен оның орынбасарларының қабылдауына жазылу жұмыстарын Төлеби ауданы әкімі аппаратының өтініштердің қаралуын бақылау және құжаттарды камтамасыз ету бөлімі жүргізеді. Қабылдауға eGov.kz порталы, e-Otinish бірыңғай базасы арқылы, сондай-ақ аудан әкімдігіне келіп, жазбаша өтініш беру арқылы тіркелуге болады.

Мұндай кездесулер билік пен халық арасындағы сенімді нығайтып, тұрғындардың әлеуметтік мәселелерін дер кезінде әрі тиімді шешуге мүмкіндік береді.

 

Төлеби ауданы әкімінің баспасөз қызметі