МӘЖІЛІС ДЕПУТАТЫ ТӨЛЕБИ АУДАНЫНДАҒЫ ӘЛЕУМЕТТІК НЫСАНДАРДЫҢ ҚҰРЫЛЫСЫМЕН ТАНЫСТЫ

ҚР Парламенті Мәжілісінің депутаты Сәдібеков Ұласбек Сәдібекұлы Төлеби ауданына арнайы іссапармен келді. Сапар барысында депутат аудан әкімі Еркеғали Әлімқұловпен бірге аудан аумағында салынып жатқан бірқатар әлеуметтік нысандардың құрылыс барысымен танысты.

 

Депутат Көксәйек елді мекенінде орналасқан спорт кешенінің құрылысымен танысты. Нысан толық аяқталған. Қазіргі таңда спорт кешенінде ішкі әрлеу жұмыстары жүргізіліп, қажетті материалдық-техникалық жабдықтармен қамтамасыз етілген. Спорт кешенін 2026 жылы пайдалануға беру жоспарлануда.

 

Сонымен қатар, Ленгір қаласындағы Қапал батыр көшесінде салынып жатқан бес қабатты үш тұрғын үйдің құрылыс барысы таныстырылды. Құрылыс жұмыстары толық аяқталып, абаттандыру жұмыстары жүргізілуде. Аталған тұрғын үйлер баспанасы апатты жағдайда тұрған азаматтарға беріледі. Нысандарды аралау барысында Мәжіліс депутаты құрылыс сапасын қатаң бақылауда ұстау қажеттігін атап өтті.

 

Іссапар аясында Ұласбек Сәдібекұлы Достық елді мекеніндегі №10 мектептің ұжымымен кездесті. Кездесу барысында білім беру саласындағы өзекті мәселелер мен заңнамалық өзгерістер туралы ақпарат беріп, Мәжілістің жыл бойы атқарған жұмыстарына тоқталды. Сондай-ақ ұстаздар тарапынан қойылған сұрақтарға жауап беріп, көтерілген мәселелер алдағы уақытта жүйелі түрде қарастырылатынын айтты.

 

Кездесу соңында Мәжіліс депутаты мектеп ұжымын келе жатқан Жаңа жыл мерекесімен құттықтап, естелік жазба қалдырды.

 

Төлеби ауданы әкімінің баспасөз қызметі