АУДАН ӘКІМІ ТҰРҒЫН ҮЙЛЕРДЕГІ ӨРТ ҚАУІПСІЗДІГІН ТЕКСЕРДІ

Төлеби ауданының әкімі Еркеғали Әлімқұловтың тапсырмасына сәйкес, аудан аумағында өрттің алдын алу және төтенше жағдайлардың алдын алу мақсатында арнайы жұмысшы топ құрылды.

 

Бүгін аудан әкімі бастаған жұмысшы топ тұрғын үйлерді жаяу аралап, жоспарлы рейдтік іс-шара өткізді. Аудан басшысы Ленгір қаласындағы Ш.Уәлиханов көшесіне барып, тұрғындармен кездесіп, өрт қауіпсіздігі талаптарын қатаң сақтау қажеттігін атап өтті.

 

«Өрт – бір ғана ұшқыннан басталып, санаулы секундтар ішінде үйді де, адам өмірін де жалмап кетуі мүмкін аса қауіпті құбылыс. Тұрғын үйлерде орын алатын өрттің салдары адам өміріне, денсаулығына және мүлікке айтарлықтай зиян келтіретіні баршаңызға белгілі. Сондықтан өрттің алдын алу – әрбіріміздің ортақ әрі маңызды міндетіміз. Сақтық шараларын сақтау – тек өз қауіпсіздігіміз үшін ғана емес, отбасымыздың амандығы үшін де аса қажет», – деді аудан басшысы.

 

Рейд барысында мамандар жеке тұрғын үйлердегі жылыту пештерінің жай-күйін тексеріп, тұрғындарға арнайы түтін және газ сигнализаторларын орнатудың маңыздылығын түсіндірді. Сонымен қатар, қауіпсіздік талаптарының сақталуына қатысты тиісті хаттамалар толтырылды.

 

Төлеби ауданы әкімінің баспасөз қызметі