ТҮРКІСТАН ОБЛЫСЫНЫҢ ӨНЕРПАЗДАРЫ БІРІНШІ ОРЫНҒА ИЕ БОЛДЫ

ТҮРКІСТАН ОБЛЫСЫНЫҢ ӨНЕРПАЗДАРЫ БІРІНШІ ОРЫНҒА ИЕ БОЛДЫ
 
✔️Бүгін Түркі әлемінің мәдени астанасында Ақтау қаласында республикалық командалық айтыс өз мәресіне жетті. Былтыр бастау алған жобаға еліміздің үш мегаполисі мен 17 облысынан жалпы 20 команда қатысқан болатын. «Маңғыстау – түркі мәдениетінің төрі» атты өнер мерекесінің ақтық кезеңінде Түркістан және Қарағанды облысының айтыскер ақындары мен күйші, жыршы-термешілерінен құралған құрамасы бақ сынады. Қазылар алқасының шешімімен қос команда жүлделі І орын мен алтын домбыраға ие болды.
✔️Ауқымды шарада Түркістан облысы мәдениет басқармасының басшысы Әзімхан Қойлыбаев арнайы команданы қолдап келді. Облыстың сәлемін жеткізіп, сый-сияпат табыстады.
✔️Аламанды айтыскер ақын, ҚР Парламенті мәжілісінің депутаты, филология ғылымдарының докторы, профессор, Қазақстанның еңбек сіңірген қайраткері, «Құрмет» орденінің иегері Аманжол Әлтай жүргізіп отырды. Қазылар алқасына жазушы, ҚР Еңбек сіңірген қайраткері, ҚР Парламентінің депутаты Жүсіп Нұртөре төрағалық етті.
Оның құрамында өнерде ерекше орны бар Алмасбек Алматов, Айгүл Үлкенбаева, Мэлс Қосымбаев, Қалқаман Сарин, Айгүл Қосанова секілді танымал тұлғалар болды.
✔️Облыс құрамасында айтыстың арыстаны, «Құрмет» орденінің иегері, «Алтын домбыра» иесі Бекарыс Шойбеков бастаған өңіріміздің мықтылары бар. Атап айтқанда команда жетекшісі, «Айтыс ақындары мен жыршы-термешілердің Халықаралық Одағы» Түркістан облысы филиалының төрағасы Тұрар Тлеулиев, ақындар бапкері Бекмұрат Анарбаев, таныстырушы Шахмардан Бекарысұлы, Бекарыс Шойбеков (Сүре айтыс), Қажымұхан Абзалов (Қайым айтыс), Дәурен Ақсақалов (Түре айтыс), Аян Ниязбек (Өтірік өлең айтысы), өнерпаздардан Оразәлі Жаңабай (Дәстүрлі әнші), Руслан Ахинбеков (Терме), Аязбек Рустамов (Жыршы), Шыңғыс Исаев (Күйші).
✔️Айта кетейік, айтысты ҚР Мәдениет және ақпарат министрлігінің және «AMANAT» партиясының қолдауымен өтіп жатқан сайысты Маңғыстау облысы әкімдігі мен Айтыс ақындары мен жыршы-термешілердің Халықаралық одағы бірлесіп ұйымдастырған.
 
Түркістан облысы әкімінің баспасөз қызметі