🇰🇿 ШАРДАРАЛЫҚ СПОРТШЫЛАР VI ДҮНИЕЖҮЗІЛІК КӨШПЕНДІЛЕР ОЙЫНДАРЫНДА 6 МЕДАЛЬ ЖЕҢІП АЛДЫ
Қырғыз Республикасында 31 тамыз – 6 қыркүйек аралығында өткен VI Дүниежүзілік көшпенділер ойындарында Қазақстан құрамасы жалпыкомандалық есепте 1-орын иеленді.
Ел спортшылары дүбірлі додада 32 алтын, 20 күміс және 22 қола, барлығы 74 медаль жеңіп алып, халықаралық аренада Қазақстанның көк туын биікте желбіретті.
Бұл жеңіске Шардара ауданынан барған спортшылар да өз үлестерін қосты. Атап айтқанда, «Шардара Армспорт» клубының өкілдері армрестлингтен жоғары нәтиже көрсетті:
Нұрдәулет Айдархан – 90 келі салмақта сол және оң қол күресінен 2 алтын медаль; Медет Құттымұратов – +90 келі салмақта сол және оң қол күресінен 2 алтын медаль;
Ұлжан Оралбай – 65 келі салмақта сол және оң қол күресінен 2 күміс медаль жеңіп алды.Осылайша, шардаралық үш спортшы Қазақстан құрамасының қоржынына 4 алтын және 2 күміс, жалпы 6 медаль салды.
Бұл – спортшылардың табандылығы мен тынымсыз еңбегінің, бапкерлердің кәсіби дайындығының және туған жерде спортты дамытуға бағытталған жүйелі жұмыстың нақты нәтижесі.
СПОРТҚА ҚОЛДАУ – ЖЕҢІСКЕ ЖОЛШардарада армрестлинг спортының дамуына үлес қосып келе жатқан «Шардара Армспорт» клубының негізін қалаушы Қарсыбаев Арман Романұлының қолдауы спортшылардың республикалық және халықаралық жарыстарға қатысып, тәжірибе жинақтауына мүмкіндік беріп келеді.
Жоғары нәтиже көрсету үшін спортшыға тек қабілет жеткіліксіз. Күнделікті жаттығу, кәсіби дайындық, қажетті құрал-жабдық, білікті бапкер және жарыс тәжірибесі – жеңістің маңызды құрамдас бөліктері.
Осы бағыттағы қолдау жас спортшылардың өз мүмкіндіктерін толық ашып, биік белестерді бағындыруына жол ашады.
Бүгінде «Шардара Армспорт» клубы аудан жастарын спортқа тартып, оларды тәртіпке, еңбекқорлыққа, төзімділікке және мақсатқа ұмтылуға тәрбиелейтін орта қалыптастырып отыр.
Ал халықаралық додадан олжалы оралған үш спортшының алты медалі – осы еңбектің жарқын нәтижесі.
Көк туымыз көкке желбірей берсін! 
Жеңісті күндеріміз көп болсын.
Алға, Шардара!