Медиация – қоғамдағы келісім мен тұрақтылықты нығайтудың тиімді құралы
Медиация – тек дауды шешудің баламалы тәсілі ғана емес, сонымен қатар азаматтардың өзара жауапкершілігін арттыратын, қоғамдағы келісім мен тұрақтылықты сақтауға бағытталған маңызды құқықтық мәдениет құралы.
Қазақстан Республикасының қолданыстағы заңнамасына сәйкес, медиация рәсіміне қатысушылар өздерінің құқықтары мен міндеттерін толық түсінуге, шешім қабылдау барысында еріктілік қағидатын сақтауға және қол жеткізілген келісім шарттарын адал орындауға тиіс.
Медиация барысында тараптардың ар-намысы мен қадір-қасиетіне құрметпен қарау, өзара сенім қалыптастыру, үшінші тұлғалардың құқықтары мен заңды мүдделерін бұзбау маңызды талаптардың бірі болып табылады. Медиатор өз қызметін жүзеге асыру кезінде тәуелсіздік, бейтараптық және құпиялық қағидаттарын басшылыққа алады.
Сонымен бірге, медиация барлық даулар бойынша қолданылмайтынын атап өткен жөн. Заң талаптарына сәйкес, тараптардың татуласуы заңмен қорғалатын мүдделерге, қоғамдық тәртіпке немесе өзге тұлғалардың құқықтарына қайшы келмеуі қажет.
Азаматтар даулы жағдай туындаған кезде мәселені ушықтырмай, алдымен келіссөз жүргізу, өзара түсіністікке ұмтылу және заңда көзделген бейбіт реттеу тетіктерін пайдалану мүмкіндігін қарастырғаны дұрыс.
Құқықтық мемлекеттің басты құндылықтарының бірі – азаматтардың заңды құрметтеуі және өз құқықтарын өркениетті жолмен қорғауы. Осы бағытта медиация институтын дамыту қоғамдағы дау-жанжалдардың алдын алуға, адамдар арасындағы өзара сыйластықты нығайтуға және құқықтық мәдениетті қалыптастыруға оң ықпал етеді.
Шардара ауданы әкімдігі тұрғындарды өз құқықтары мен міндеттерін білуге, заң талаптарын сақтауға, туындаған мәселелерді бейбіт келісім арқылы шешу мүмкіндіктерін пайдалануға шақырады.
Қоғамдық келісім мен тұрақтылықты сақтау – әр азаматтың ортақ жауапкершілігі. Заң үстемдігін қамтамасыз ету, құқықтық сауаттылықты арттыру және медиация сияқты тиімді тетіктерді кеңінен қолдану – әділетті әрі үйлесімді қоғам қалыптастырудың маңызды бағыттарының бірі болып қала береді.
Шардара ауданы әкімдігінің баспасөз қызметі.