Нұрдәулет Айдархан – Әлемді бағындырған қазақ білегі

Нұрдәулет Айдархан – Қазақстан Республикасының еңбек сіңірген спорт шебері, халықаралық дәрежедегі спорт шебері, әлемдік деңгейде жоғары нәтижелерге қол жеткізген танымал армрестлинг (қол күресі) спортшысы. Ол 1997 жылғы 8 наурызда Түркістан облысы, Шардара ауданында дүниеге келген. Қазіргі таңда Түркістан облысындағы «Шардара Армспорт» клубының намысын қорғап, халықаралық жарыстарда Қазақстан Республикасының абыройын асқақтатып жүрген үздік спортшылардың бірі.

Нұрдәулет Айдарханның спорттағы жетістіктері – еліміздегі қол күресі спортының дамуына қосылған елеулі үлес. Ол қол күресінен 12 дүркін әлем чемпионы атанып, жастар және ересектер арасында өткен әлем чемпионаттарында бірнеше мәрте жеңіс тұғырынан көрінді. Өзінің табандылығы, жоғары кәсіби шеберлігі мен үздік спорттық нәтижелерінің арқасында халықаралық аренада Қазақстанның беделін арттыруға зор еңбек сіңіріп келеді.

Нұрдәулет Айдарханның әлемдік деңгейдегі жеңістері әртүрлі мемлекеттерде өткен беделді халықаралық жарыстарда тіркелген. Атап айтқанда, ол:

• Болгарияда өткен әлем чемпионаттарында бірнеше мәрте алтын медаль жеңіп алып, әлем чемпионы атанды;

• Польшада ұйымдастырылған әлем чемпионатында чемпиондық атақты иеленді;

• Румынияда өткен әлем чемпионатында жеңімпаз атанды;

• Түркияда өткен әлем чемпионатында алтын медаль жеңіп алды;

• Францияда өткен әлем чемпионатында Қазақстан қоржынына кезекті алтын жүлдені салды;

• Малайзияда өткен әлем чемпионатында жоғары нәтиже көрсетіп, әлем чемпионы атанды;

• Словакияда өткен халықаралық додада әлем чемпионы атағын қорғады;

• Грузияда өткен әлем чемпионатында алтын медаль иеленді;

• Сауд Арабиясының Эр-Рияд қаласында 2023 жылы өткен World Combat Games дүниежүзілік спорт ойындарында ерлер арасында 80 келі салмақ дәрежесінде (сол қол) алтын медаль жеңіп алып, Қазақстан құрамасының қоржынына тарихи жеңіс сыйлады.

Сонымен қатар Нұрдәулет Айдархан Азия чемпионаттарында да тұрақты түрде жоғары нәтиже көрсетіп, бірнеше мәрте Азия чемпионы және халықаралық турнирлердің жеңімпазы атанды. Ол әлем кубоктары мен халықаралық рейтингтік жарыстарда Қазақстан құрамасының көшбасшы спортшыларының бірі ретінде ел намысын абыроймен қорғап келеді.

Спортшының халықаралық деңгейдегі жетістіктері Қазақстан армрестлингінің әлемдік деңгейдегі әлеуетін айқын көрсетіп, еліміздің спорт саласындағы беделін арттыруға зор үлес қосуда.

Нұрдәулет Айдарханның жоғары спорттық жетістіктері мемлекет тарапынан да лайықты бағаланды. Атап айтқанда, оның 2018 жылғы әлем чемпионатындағы жеңісінен кейін Түркістан облысының сол кездегі әкімі спортшыға автокөлік сыйға тартты. Бұл – ел намысын халықаралық жарыстарда абыроймен қорғаған спортшыларды мемлекеттік қолдау мен ынталандырудың нақты көрінісі.

Қазақстан Республикасының «Дене шынықтыру және спорт туралы» Заңында көзделген бұқаралық спортты дамыту, жоғары жетістіктер спортын қолдау және жас ұрпақты салауатты өмір салтына баулу бағытындағы мемлекеттік саясатты іске асыруда Нұрдәулет Айдарханның жетістіктері маңызды орын алады. Оның жеңістері жастарды спортпен тұрақты айналысуға ынталандырып, отансүйгіштікке, еңбекқорлыққа және жоғары нәтижеге ұмтылуға тәрбиелеуде өнегелі үлгі болып табылады.

Бүгінде Нұрдәулет Айдархан Шардара армрестлинг мектебінің ең жарқын өкілдерінің бірі ретінде танылып, өзінің қажырлы еңбегі мен кәсіби шеберлігінің арқасында Қазақстанның әлемдік спорт аренасындағы беделін нығайтуға және қол күресі спортының одан әрі дамуына сүбелі үлес қосып келеді.

Шардара ауданы әкімдігінің баспасөз қызметі.