АРМРЕСТЛИНГТЕН VIII ХАЛЫҚ ОЙЫНДАРЫНДА ЖЕҢІСКЕ ЖЕТКЕН ШАРДАРАЛЫҚ СПОРТШЫЛАР МАРАПАТТАЛДЫ
Бүгін Шардара ауданының әкімі Арман Романұлы Қарсыбаев Түркістан қаласында өткен VIII Халық ойындары аясындағы армрестлинг жарысында жоғары нәтиже көрсетіп, Түркістан облысының жалпыкомандалық есепте І орын иеленуіне зор үлес қосқан «Шардара Армспорт» спорт клубының спортшылары мен жаттықтырушыларын марапаттады.
Іс-шара барысында аудан әкімі спортшыларды жарқын жеңістерімен құттықтап, бұл жетістік тек спортшылардың ғана емес, бүкіл ауданның абыройын асқақтатқан маңызды жеңіс екенін атап өтті.
– Сіздер VIII Халық ойындарында жоғары шеберлік пен қайсарлықтың үлгісін көрсетіп, Түркістан облысының мерейін үстем еттіңіздер. Бұл – жүйелі дайындық пен тынымсыз еңбектің жемісі. Шардара спортының беделін көтеріп, жас буынға үлгі болдыңыздар. Алдағы уақытта да биік белестерді бағындырып, еліміздің көк Туын халықаралық ареналарда желбірете берулеріңізге тілектеспін, – деді Арман Романұлы.
Аудан басшысы спортшылар мен жаттықтырушыларға жоғары спорттық жетістіктері мен аудан спортының дамуына қосқан үлестері үшін өз атынан Алғыс хаттар табыстап, демеушілер есебінен сый-сияпат жасады.
Атап айтқанда, аудан әкімінің марапатына Ақбаева Жазира, Мәлік Арайлым, Қаржау Есболат, Роман Данияр, Басымбек Нұрболат және Полат Ермахан ие болды.
Сондай-ақ спортшыларды жеңіске жетелеген тәжірибелі жаттықтырушылар Малбасов Ғани мен Аманов Бақберген де аудан әкімінің Алғыс хатымен және демеушілердің сый-сияпатымен марапатталды.
Айта кетейік, Түркістанда өткен VIII Халық ойындарында елдің түкпір-түкпірінен келген мықты спортшылар бақ сынаған тартысты бәсекеде Түркістан облысының құрамасы жалпыкомандалық есепте І орынды иеленіп, өңірдегі армрестлинг спортының жоғары деңгейін тағы бір мәрте дәлелдеді.
Шардара спортының мерейін өсіріп жүрген спортшыларымыз бен жаттықтырушыларымызды айтулы жетістіктерімен құттықтап, алдағы жарыстарда да толағай табыстар тілейміз!
Шардара ауданы әкімдігінің баспасөз қызметі