Шардара жұртшылығы Мемлекеттік рәміздер күнін атап өтті:
2026 жылғы 4 маусым күні Қазақстан Республикасының Мемлекеттік рәміздері күніне орай Шардара қаласындағы Шежіре саябағында салтанатты мерекелік іс-шара жоғары деңгейде ұйымдастырылды. Елдік пен егемендіктің айшықты белгілері саналатын Мемлекеттік Ту, Мемлекеттік Елтаңба және Мемлекеттік Әнұранды ұлықтауға арналған шараға аудан тұрғындары, ардагерлер, жастар, мемлекеттік қызметкерлер, білім беру ұйымдарының өкілдері және қоғамдық ұйым мүшелері қатысты.
Іс-шара барысында Шардара ауданы әкімінің орынбасары Бисенбай Төребеков және аудандық ардагерлер кеңесінің төрағасы Тоқсанбай Бердібеков құттықтау сөз сөйлеп, жиналған қауымды айтулы мерекемен құттықтады. Өз сөздерінде олар мемлекеттік рәміздердің ел тәуелсіздігін айқындайтын қасиетті құндылықтар екенін атап өтіп, жас ұрпақты отансүйгіштікке, ел тарихы мен ұлттық құндылықтарды құрметтеуге тәрбиелеудің маңыздылығына тоқталды.
Салтанатты жиын Қазақстан Республикасының Мемлекеттік Туын көтеру рәсімімен басталып, Мемлекеттік Әнұранның орындалуымен жалғасты. Әнұран шырқалған сәтте қатысушылар ерекше құрмет көрсетіп, елге деген сүйіспеншілік пен мақтаныш сезімдерін білдірді. Мерекелік шара аясында мемлекеттік рәміздердің тарихы мен мән-маңызы туралы ақпараттар айтылып, олардың тәуелсіз Қазақстанның қалыптасуы мен дамуы жолындағы ерекше орны кеңінен насихатталды.
Іс-шара барысында жастар арасында патриоттық рухты нығайтуға бағытталған тәрбиелік мазмұндағы кездесулер өткізіліп, мемлекеттік рәміздерді құрметтеу мәдениетін қалыптастыру мәселелері көтерілді. Қатысушылар еліміздің көк байрағы, айшықты Елтаңбасы мен қастерлі Әнұраны әрбір қазақстандықтың жүрегінен ерекше орын алатынын атап өтті.
Шара соңында жиналған жұртшылық Қазақстанның жарқын болашағы мен тұрақты дамуы жолында бірлік пен татулықтың маңызын ерекше атап өтіп, мемлекеттік рәміздерге құрмет көрсету – әр азаматтың қасиетті парызы әрі ел алдындағы жауапкершілігі екенін жеткізді. Мерекелік іс-шара жоғары көңіл-күйде өтіп, қатысушыларға патриоттық рух пен ұлттық мақтаныш сезімін сыйлады.
Шардара ауданы әкімдігінің баспасөз қызметі