Шардара ауданында «Ұлттық құндылықтар апталығы» аясында тағылымы мол, тәрбиелік мәні зор байқау жоғары деңгейде өтті.
Түркістан облысы Қоғамдық даму басқармасының «Жалпы ұлттық құндылықтар – ел дамуы» атты жобасы аясында ұйымдастырылған «Ұлттық құндылықтар апталығы» байқауы бекітілген кестеге сәйкес қала және аудандарда өтуде. Бүгін осы шара Шардара ауданында өз жалғасын тапты.
Шара барысында халқымыздың асыл мұралары – салт-дәстүр, ұлттық киім, қолөнер, спорттық ойындар, ұлттық тағамдар және күй мен жыр-терме өнері кеңінен насихатталды. Қатысушылар ата-бабадан аманат болған құндылықтарды сахна төрінде жаңғыртып, көрерменге ерекше әсер сыйлады.
Байқауға ауданымыздағы бірқатар мекемелер белсене қатысып, ұлттық құндылықтарды дәріптеуге өз үлестерін қосты: Шардара қаласындағы №16 колледж ұжымы ұлттық киімдер көрмесін ұсынып, қазақы нақыштағы сән үлгілерін таныстырды. Аудандық жұмыспен қамту бөлімінің «Қасиет» әлеуметтік қызметтер көрсету орталығының апалар тобы салт-дәстүрлерді, соның ішінде керегеге орамал таңу дәстүрін сахналап, оның тәрбиелік мәнін көрсетті. Аудандық балалар саз мектебі күй, жыр-терме және ән өнері арқылы ұлттық рухты асқақтатты.
Сонымен қатар, «Қасиет» орталығы мен №16 колледж тарапынан қолөнер бұйымдарының көрмесі ұйымдастырылып, шеберлердің еңбектері көпшілік назарына ұсынылды.
Шара соңында аудандық мәдениет үйі өнерпаздарының қатысуымен концерттік бағдарлама ұсынылып, көрермендерге көтеріңкі көңіл-күй сыйлады.
Түркістан қаласынан келген қазылар алқасы қатысушылардың өнеріне жоғары баға беріп, ұлттық құндылықтарды дәріптеу жолындағы еңбектеріне ризашылықтарын білдірді. Сондай-ақ, байқаудың өтуіне үлес қосқан бірқатар азаматтар Түркістан облысы Қоғамдық даму басқармасының алғыс хатымен марапатталды.
Осындай игі бастамалар ұлт руханиятын нығайтып, өскелең ұрпаққа тағылымды тәрбие беретіні сөзсіз.