ШАРДАРАДА ҚАРЖЫЛЫҚ САУАТТЫЛЫҚТЫ АРТТЫРУ ЖОБАСЫ АЯСЫНДА КЕҢЕСТЕР БЕРІЛДІ
Шардара қаласында «Қаржылық сауаттылықты арттыру және борышкерлерге құқықтық қолдау көрсету» жобасы аясында аудан жастарына арналған ашық форматтағы семинар өтті. Іс-шараны «Бәйтерек» жастар ұйымы» қоғамдық бірлестігі ұйымдастырды. Семинар Шардара қалалық “Жастар ресурстық орталығы” КММ-нің ғимаратында өткізілді.
Кездесуге «Қарызсыз қоғам» жобасының Түркістан облысы бойынша үйлестірушісі Жандос Әзімбай, «Бәйтерек» жастар ұйымының төрағасы Ролан Қонысбеков, педагог-психолог Шара Абдирахманова, сондай-ақ қала мен ауылдардан келген белсенді жастар мен тұрғындар қатысты.
Іс-шара барысында Жандос Әзімбай жастарға қаржылық және құқықтық сауаттылықтың маңыздылығын түсіндіріп, күнделікті өмірде алаяқтық, заңсыз несиелер және шоттардың бұғатталуы сынды қауіптердің алдын алу үшін құқықтық білімнің қажет екенін атап өтті.
– Әр азамат өз құқығы мен міндетін нақты білуі тиіс. Бұл тек заң алдындағы жауапкершілік емес, жеке қауіпсіздіктің негізі, – деді ол.
Ал педагог-психолог Шара Абдирахманова қаржылық қиындықтардың адамның психологиялық жай-күйіне тигізетін әсерін тілге тиек етті.
– Қаржылық тұрақсыздық күйзеліс, жанұялық мәселелер мен сенімсіздікке әкелуі мүмкін. Сол себепті қаржыны ғана емес, эмоцияны басқару да маңызды, – деді ол.
Семинар соңында қатысушылар көкейдегі сұрақтарын қойып, сала мамандарынан тиісті жауаптар алды. Іс-шара жастардың қаржылық сауаттылығын арттыруға, құқықтық қорғаныс деңгейін көтеруге бағытталған тиімді диалог алаңына айналды.
Шардара ауданы әкімінің баспасөз қызметі