САРЫАҒАШ: КЕҢЕЙТІЛГЕН ЖҰМЫС ЖИЫНЫ ӨТТІ

Сарыағаш ауданының әкімі Арман Абдуллаев төрағалығымен Сарыағаш қаласының аумағы арқылы өтетін республикалық маңызы бар А-15 автомобиль жолының бойын сәулеттік талаптарға сай абаттандыру және көріктендіру мәселелері бойынша кеңейтілген жұмыс жиыны өтті.

Жиынға Сарыағаш қаласының әкімі Айыпхан Ешанқұл, сәулет және құрылыс, қала құрылысы бөлімдерінің жауапты мамандары, сондай-ақ мердігер мекеме өкілдері қатысты.

Кеңес барысында А-15 автожолы бойындағы аумақты абаттандыру, көгалдандыру жұмыстарын жүйелі жүргізу, сондай-ақ санитарлық талаптарды сақтау мәселелері жан-жақты талқыланды.

Аудан басшысы өз сөзінде аталған жобаның негізгі мақсаты – қаланың сәулеттік келбетін қалыптастыру және сақтау, жол бойындағы инфрақұрылымды заманауи талаптарға сәйкестендіру, сонымен қатар өңірге келетін туристер үшін қолайлы әрі тартымды орта қалыптастыру екенін атап өтті. Осы бағытта барлық жауапты мекемелерге нақты тапсырмалар беріліп, жұмыстарды сапалы әрі белгіленген мерзімде орындау қажеттігі қатаң ескертілді. Іс-шаралар жоспарын әзірлеу, сондай-ақ атқарылып жатқан жұмыстардың барысын тұрақты бақылауда ұстау міндеттелді.

Сарыағаш ауданы әкімінің баспасөз қызметі