БАЛАЛАРДЫҢ ШАТТЫҚҚА ТОЛЫ ЖАЗЫ БАСТАЛДЫ!
Отырар ауданында балалардың жазғы демалысын тиімді ұйымдастыруға бағытталған жазғы сауықтыру лагерінің ашылу салтанаты өтті.
Салтанатты шараға аудан әкімі Қайрат Жолдыбайұлы мен аудандық мәслихат төрағасы Уалихан Ұзақов қатысып, лагерьдің тыныс-тіршілігімен танысты. Қонақтар балаларға жасалған жағдайларды көріп, қауіпсіз әрі мазмұнды демалыс ұйымдастыру бағытындағы жұмыстарға оң бағасын берді.
Жазғы демалыс маусымының басталуымен бүлдіршіндерді құттықтаған аудан басшылығы оларға көтеріңкі көңіл-күй, жаңа достар, жарқын әсерлер мен ұмытылмас сәттер тіледі.
Лагерьде балалардың бос уақытын тиімді өткізуге барлық мүмкіндік қарастырылған. Спорттық жарыстар, мәдени-танымдық шаралар, шығармашылық және зияткерлік бағдарламалар арқылы оқушылардың жан-жақты дамуына жағдай жасалмақ.
Айта кетейік, биылғы жазғы маусымда сауықтыру лагерінде ауданның 1000-ға жуық баласы демалып, түрлі сауықтыру және тәрбиелік шаралармен қамтылады.
Балалардың шат күлкісі мен қуанышқа толы жүздері – жазғы демалыс маусымының сәтті басталғанының жарқын көрінісі.