АУДАНДА КИЕЛІ ОРЫНДАРДА АУҚЫМДЫ СЕНБІЛІК ӨТТІ

Отырар ауданындағы киелі орындарда «Таза Қазақстан» шарасы аясында ауқымды тазалық жұмыстары ұйымдастырылды. Игі шараға аудандағы жалпы кәсіпорындардың, қоғамдық, бюджеттік ұйымдардың қызметкерлері, Отырар мемлекеттік археологиялық музей-қорығының ұжымы мен аудан тұрғындары, жалпы 500-ге жуық адам қатысты.

Сенбілік барысында «Арыстанбаба» кесенесінің аумағы мен «Отырар төбе» қалажұрты маңы ретке келтіріліп, айналадағы табиғи шөптер шабылды.

Тазалық шарасында 4 арнайы техниканың көмегімен 2,6 тонна қоқыс арнайы аумаққа шығарылды. Көше бойындағы ағаштардың қураған бұтақтары қырқылып, түптерін қопсыту, әктеу, көшет егу жұмыстары жүргізілді.

Бүгінде тарихи ескерткіштер мен мәдени кеңістіктерді сақтау – қоғам алдындағы маңызды міндеттердің бірі. Мәдени мұра нысандарын қорғау, оларды күтіп-ұстау және көркейту бағытындағы жүйелі жұмыстар жалғаса бермек.