Биыл ХІХ ғасырдың екінші жартысында өмір сүрген Қаратау өңірі шайырларының көрнекті өкілі әрі күнгейлік ақындар мектебінің негізін қалаушылардың бірі Майлықожа Сұлтанқожаұлының 185 жылдық мерейтойы.
Өз тұсындағы саяси-әлеуметтік оқиғалардың барлығына дерлік өзіндік көзқарасын білдіріп отырған және өз заманындағы әдеби үдерістердің ешқайсысынан тыс қалмаған ақынның әдеби мұрасын ұлттық мүдде тұрғысынан қайта жаңғырту бүгінгі ұрпақтың басты мақсаты. Осы орайда Түркістан облысының әкімдігі мен Қожа Ахмет Ясауи атындағы қазақ-түрік университетінің ұйымдастыруымен зерттеуші ғалымдардан құралған топ ауданымызда болып, киелі өңіріміздегі Отырар руханият музейіндегі ақын туралы тың деректермен танысты.
Топ мүшелері Д.Кенжетай, Н.Мансуров, Е.Оспанов, С.Саттаров, А.Жаппарқұловалардың және Халық ақыны Ә.Қалыбекованың қатысуларымен ақын мұрасы қайта сараланып, ақын өмірі жайында түсірілетін деректі фильмнің жоспары талқыға салынды. Майлықожа мұрасының халық жадында қалған қандай да бір деректері экспедиция жұмысына үлкен көмек.
Осы ретте шараға арнайы қатысқан аудан әкімінің орынбасары Пердехан Жаппарқұлов ақын шығармаларының зерттелу тарихнамасын жасауға тың деректер іздеген экспедиция жұмысына сәттілік тіледі.