Бүгінгі күні азаматтарды табиғи құбылыстар мен техногендік сипаттағы апаттардан қорғау, зілзалалардың қауіп-қатерін азайту мәселесі мемлекеттің басты назарында. Құтқарушы мамандығының ең басты міндеті – адам өмірін құтқару, бұл жоғары және жауапты миссия. Дүлей апаттың айтып келмейтіні рас. Тосыннан келген апат кезінде азаматтарға бірінші болып көмекке келетін төтенше жағдай қызметінің құтқарушылары. Бұл іс кез келгеннің қолынан келе бермеуі мүмкін. Өйткені, оған мықты жүрек, машық және тәжірибе керек.
Биыл еліміздегі азаматтық қорғау органдарының құрылғанына 25 жыл. Осы ретте 19 қазан – құтқарушылар күніне орай аудандық №9 мамандандырылған өрт сөндіру бөлімінде мерекелік шара өткізілді. Аталған шараға аудан әкімінің орынбасары Пердехан Жаппарқұлов қатысып, құттықтау сөз сөйледі. Ол өз сөзінде: - «Еліміздің азаматтық қорғау органдарының қызметкерлері 25 жылдан бері халықтың қауіпсіздігін сақтау жолында аянбай еңбек етіп келеді. Осы уақыт аралығында төтенше жағдайлардың алдын алу мен жою, жедел әрекет ету қағидасы қалыптасып, тиімді жүйе құрылды. Құтқарушы – батылдықты, қырағылықты, шеберлікті қажет ететін жауапты мамандық. Сіздерді бүгінгі кәсіби мерекелеріңізбен құттықтай отырып, зор денсаулық, отбасыларыңызға амандық, қызметтеріңізге табыс тілеймін!» -деп жылы лебізін жеткізді.
Жиын барысында аудан әкімінің орынбасары тұрғындардың тыныштығы мен қауіпсіздігі жолындағы міндетін бұлжытпай орындап, азаматтық қорғаудың мемлекеттік жүйесін дамытуға қосқан зор үлесі үшін және апаттың алдын алу, төнген қатерден халықтың өмірі мен денсаулығын сақтап қалудағы қызметі үшін аудандық өрт сөндіру бөлімінің бірқатар қызметкерлеріне аудан әкімі Әбдіғали Жүнісовтің Алғыс хаттарын тапсырды. Алғыс хатта «Сізді 19 қазан – азаматтық қорғау органдарының құрылуына 25 жыл толуымен шын жүректен құттықтап, Сізге кәсіби мерекеде жарқын белестер мен мол табысқа бөленуіңізді, бастаған ісіңізді сәтті аяқтап, қызмет барысындағы еңбегіңіздің жемісті болуын, алға қойған жоспарларыңыздың орындалуын тілеймін! Мереке құтты болсын, денсаулығыңыз мықты болсын!»-делінген.
Жалпы ауданымызда №9 - өрт сөндіру бөлімі мен Маяқұм ауылындағы №30 - өрт сөндіру бекеті ел тыныштығы мен қауіпсіздігі жолында аянбай еңбек етіп келеді. Аталған бөлімде барлығы 57 қызметкер жұмыс істейді. Олардың қай-қайсысы болса да өз міндеттерін мінсіз атқаратын қайсар жандар.