ЖАҢА ЖЫЛ ҚАРСАҢЫНДА ЖАҢА СПОРТ АЛАҢШАСЫ ЕЛ ИГІЛІГІНЕ БЕРІЛДІ

Бүгін ауданымызға қарасты Ынталы ауылында ел күткен маңызды спорт нысаны – жабық қаңқалы спорт алаңшасының салтанатты ашылу рәсімі өтті. Шараға аудан әкімі Азат Оралбаев, облыстық мәслихат депутаттары Дулат Әбіш, Ғани Райымбеков, аудандық ардагерлер кеңесінің төрағасы, зиялы қауым өкілдері, ауыл тұрғындары, спорт ардагерлері мен жанкүйерлері қатысты.

Салтанатты жиында аудан әкімі Азат Оралбаев құттықтау сөз сөйлеп, аталған нысанның ауыл тұрғындары үшін маңыздылығына тоқталды. «Мемлекет басшысы Қасым-Жомарт Тоқаевтың тапсырмасына сәйкес, ауылдық елді мекендерде спорт нысандарының қолжетімділігін арттыру бағытында ауданымызда жүйелі жұмыстар жүргізілуде. Соңғы жылдары Темірлан және Бадам елді мекендерінде спорттық-сауықтыру кешендері ашылып, бүгінде онда балалар мен жастар тұрақты түрде жаттығып келеді. Бұл – бұқаралық спортты дамытудың нақты көрінісі», – деді аудан әкімі.

Айта кетейік, сонымен қатар биыл аудан үшін маңызы зор Қажымұқан Мұңайтпасұлы атындағы мәдени-спорттық кешен пайдалануға беріліп, Темірлан елді мекеніндегі жабық қаңқалы брезентті спорт алаңшасы мен аллея тұрғындардың сүйікті демалыс және спорт аймағына айналған.

Аудан басшысы өз сөзінде бүгін ашылып отырған нысан да осы жұмыстардың жүйелі жалғасы екенін атап өтті. «Бұл спорт алаңшасы ауыл балаларының еркін жаттығу жасап, жарыстарға дайындалуына, тұрғындардың салауатты өмір салтын ұстануына мүмкіндік береді. Алдағы уақытта да ауданымызда спорт инфрақұрылымын дамыту жұмыстары жүйелі түрде жалғасатын болады», – деді Азат Оралбаев.

Шара барысында құрметті қонақтар да жаңа алаңшаның ашылуымен құттықтай отырып, жаңа нысанның ауыл спортының дамуына серпін беріп, талай жеңістердің ордасына айналуына тілектестік білдірді. Ауыл ақсақалдары ақ батасын арнады.

Жаңа спорт алаңшасының құрылысы «Арыс Инвест Строй» ЖШС мердігерлігімен жүргізілген. Техникалық қадағалауды «Гранд Пром Сервис» ЖШС, авторлық қадағалауды «Ecosintez» ЖШС жүзеге асырған. Жобаның жалпы құны 88 480 мың теңгені құрайды. Құрылыс жұмыстары 2025–2026 жылдарға жоспарланған мерзімде іске асырылды.