ӘСКЕРГЕ ШАҚЫРУ НАУҚАНЫ МЕН КҮЗГІ ТАЛ ЕГУ ЖҰМЫСТАРЫ ТАЛҚЫЛАНДЫ

Бүгін Ордабасы ауданының әкімі Азат Оралбаевтың төрағалығымен маңызды екі бағытты қамтитын — күзгі әскерге шақыру науқаны мен күзгі тал егу жұмыстарының орындалуына арналған кеңейтілген жұмыс жиыны өтті. Басқосуға аудан әкімінің орынбасарлары, аудан әкімі аппаратының басшысы, тиісті бөлім басшылары, сондай-ақ ауылдық округ әкімдері қатысты.

Жиында күн тәртібіндегі алғашқы мәселе ретінде күзгі әскерге шақыру жұмыстарының барысы талқыланды. Әрбір ауылдық округ бойынша есеп тыңдалып, көрсеткіштердің орындалуы, жоспар мен нақты нәтиженің арақатынасы сараланды. Бірқатар округтердегі кемшіліктер атап өтіліп, олардың себептері мен шешу жолдары қаралды.

Аудан басшысы жауапты сала жетекшілеріне жастарды әскерге шақыру бағытындағы жұмыстарды күшейтуді, халықпен түсіндіру жұмыстарын жүйелі жүргізуді және заң аясындағы талаптардың толық орындалуын қамтамасыз етуді тапсырды. Сонымен қатар, науқан барысында кешенді әрі алдын ала жоспарланған шараларды жүзеге асырудың маңыздылығын атап өтті.

Келесі мәселе – күзгі тал егу және егілген көшеттерді күтіп-баптау жұмыстары. Жиын барысында биыл егілген тал-теректердің ахуалы, қоршау және қорғау шараларының ұйымдастырылуы қаралды. Ауылдық округ әкімдері аталған бағыт бойынша атқарылған жұмыстар туралы есеп беріп, өзекті мәселелерді ортаға салды.

Аудан әкімі егілген әр талдың сақталуына жауапкершілікпен қарау керектігін айтып, көшеттерді күтіп-баптау жұмыстарын тұрақты түрде бақылап отыруды жүктеді. Сонымен бірге, көгалдандыру ісінде жүйелілік пен нәтижелілік болуы үшін жауапты бөлімдерге нақты міндеттер қойды.

Жиын қорытындысында аудан әкімі әр сала бойынша тапсырылған міндеттердің орындалуын қатаң бақылауға алатынын жеткізіп, тиісті басшыларға бекітілген жоспарды уақытылы әрі сапалы атқаруды міндеттеді.