МЕКТЕПТЕРДІҢ ЖӨНДЕУ ЖҰМЫСТАРЫ ЖІТІ НАЗАРДА

Жаңа оқу жылы басталуға жақын. Түркістан облысы әкімінің орынбасары Бейсенбай Тәжібаев ауданға іссапармен келіп, қайта жаңғыртудан өткен мектептердің жай-күйімен танысты.

Алдымен Темірлан ауылында орналасқан Шоқан Уалиханов атындағы мектеп-гимназиясында болды. 1986 жылы салынған, жобалық қуаттылығы 780 орындық білім ордасына маусым айынан бастап ағымдағы жөндеу жұмыстары жүргізілуде. Мердігер ұйым – «Ecosintez» ЖШС.

Облыс әкімінің орынбасары мұнан соң Шұбарсу ауылындағы Атамекен жалпы орта мектебін аралады. Ғимараты 2010 жылы пайдалануға берілген. 600 орынға арналған бұл мектепте бүгінде 962 оқушы бар. Жөндеу жұмыстары «Gold-ART» ЖШС-мен келісім негізінде жүргізілді. Қазір білім ұясы жаңа оқу жылына дайын. Нысанды тазалау және жиһаздарды орналастыру жұмыстары атқарылуда.

Іс-сапар аясында Темірлан ауылында орналасқан Өнер мектебінің жаңа ғимаратының құрылыс жұмыстары да пысықталды. Бұған дейін мектеп 1974 жылы салынған, ескірген ғимаратта жұмыс істеп келген. Бүгінде мұнда 12 түрлі өнер пәні оқытылады, кәсіби біліктілігі жоғары 42 педагог қызмет атқарады. Қазіргі таңда жаңа ғимараттың құрылысы қарқынды жүргізілуде. Мектеп 300 орынға арналған және заманауи музыка, хореография залдарымен, сондай-ақ Еуропадан жеткізілетін жаңа техникалық жабдықтармен қамтылатын болады.

Сонымен қатар Қараспан ауылында салынып жатқан күз мезгілінде ел игілігіне берілетін дәрігерлік амбулаторияның ахуалын көрді.

Сапар барысында мердігер мекемелер мен жауапты тұлғаларға нақты тапсырмалар берілді.