ТҮРКІСТАН: БЕКЗАТ САТТАРХАНОВ ТУРАЛЫ «ЖАРҚ ЕТІП СӨНГЕН 20 ЖАС» КІТАБЫНЫҢ ТҰСАУКЕСЕРІ ӨТТІ

Бүгін Оқушылар сарайында қазақ спорт тарихында есімі алтын әріппен жазылған Бекзат Саттархановтың қысқа, бірақ жарқын ғұмырына арналған «Жарқ етіп сөнген 20 жас» кітабының тұсаукесері өтті.

 

Жиынға батыр Бекзаттың анасы Сырлыгүл Шойбекова, танымал спортшылар, зиялы қауым және БАҚ өкілдері мен мектеп оқушылары қатысты.

 

Кітапты шығару туралы идеяны ұсынған Оқушылар сарайының директоры Индира Икапова жас балалардың жігерін ояту үшін осындай кітаптар жазу, кездесулер ұйымдастыру маңызды екенін айтып өтті.

 

Басқосуда Сырлыгүл Шойбекова баласының спортқа деген сүйіспеншілігі мен табандылығы туралы естеліктерімен бөлісті. «Ұлдың табысты болуы – ең алдымен, ананың тәлімінің нәтижесі» деген ұлағатты сөзді негізге ала отырып, қатысушылар Бекзаттай батырды тәрбиелеген анасына алғыс білдірді.

 

Кітаптың авторы Ержан Арғынбаев туындының жазылу тарихын таныстырып, Бекзаттың жеңісті жолы, рухани болмысы мен армандары туралы баяндады. Оның айтуынша, бұл кітап спортшының өмірбаяны ғана емес, жасампаздық пен қайсарлықтың символына айналған рухани еңбек.

 

Кездесу барысында қатысушылар Бекзаттың мұрасын сақтау мен дәріптеу жайлы ой-пікірлерін ортаға салып, көкейдегі сұрақтарын қойды. Бұл еңбектің жас буынға мотивация беріп, жаңа белестерді бағындыруға жігер сыйлайтынына сенім білдірді.

 

Түркістан облысы мәдениет басқармасының баспасөз қызметі