АҚЫН МҰҚАҒАЛИ КЕНЖЕТАЙҰЛЫ «КҮМІС ҚАЛАМ» БАЙҚАУЫНАН 1-ОРЫН ИЕЛЕНДІ

Бүгін Шымкент қаласында «Күміс қалам» республикалық байқауы өтті. Жыр додасы қазақ балалар әдебиетінің көрнекті өкілі, ақын Өтебай Тұрманжанұлының 120 жылдығына арналды.

 

Әз Наурыз қарсаңында биыл төртінші рет ұйымдастырылған байқауға еліміздің түкпір-түкпірінен келген дарынды, 18 бен 35 жас аралығындағы жастар қатысты. 12 ақыннан іріктеліп шыққан 8 ақын дуельге шықты. 4 жұпқа бөлінген үміткерлерден соңында екі ақын қалып, бас жүлдені сарапқа салды.

 

Қазылар алқасының құрамында ҚР Парламент Мәжілісінің депутаты, белгілі ақын Жанарбек Әшімжан мен әдебиет майталмандары бар. Сайыс нәтижесінде бас жүлде Қызылордалық ақын Ақжол Түменбайға бұйырды. Ал 1-орынды Түркістан облысының ақыны, Түркістан облыстық мәдениет басқармасының бөлім басшысы Мұқағали Кенжетайұлы иеленіп, 700 мың теңгенің иегері атанды.

 

Қала әкімдігінің ұйымдастыруымен өткен жыр додасы алдағы уақытта «Күміс көмей» дәстүрлі жас әншілер байқауы мен «Күміс домбыра» айтыскер ақындар сайысына жалғаспақ.

 

Түркістан облысы мәдениет басқармасының баспасөз қызметі