«ЖАСТАР» САЯБАҒЫНДА БАЛАЛАР КІТАП ТАЛҚЫЛАДЫ

Ыбырай Алтынсарин атындағы облыстық балалар кітапханасы Түркістан қаласының «Жастар» саябағында «Кітаппен өткен күн қызық» атты кезекті отырысын өткізді.

 

Оқырман клубының отырысында Бейбіт Қойшыбаевтың «Ғажайып шақ» жинағындағы «Ғашықтық» әңгімесі талқыланды. Клуб қатысушылары шығарма желісі бойынша өз түсінгенін ортаға салып, шығарма кейіпкерлерінің жағымды не жағымсыз жақтарына жеке-жеке тоқталып өтті.

 

Сонымен қатар, оқырман балалар шығармаға байланысты психологиялық, логикалық ойындар ойнап, ішкі эмоцияларын еркін шығара білді. Кітап оқып, оны достарымен бірге талқылау оқырман балаларға ерекше көңіл-күй сыйлады.

 

Оқырман клубының келесі отырысында талқылау үшін Нұрғали Оразовтың «Ақ ұлпа» кітабы таңдалды. Қатысушылар аталған кітаптың ішіндегі бір шығарманы таңдап, оқуды жоспарлап отыр.

 

Кітапхана ұжымы кішкентай оқырмандарды балалар кітапханасының оқырман клубына мүше болып, бірге кітап оқуға шақырады!