ТҮРКІСТАНДА АЛҒАШ РЕТ ТЕМІРЖАН ЕРЖАНОВТЫҢ КЛАССИКАЛЫҚ МУЗЫКАЛЫҚ КЕШІ ӨТТІ

Түркістан қаласындағы «Конгресс Холл» кешенінде әлемнің әйгілі концерт залдарын бағындырған, АҚШ-та тұратын қазақстандық талантты пианист, дирижер, ҚР Еңбек сіңірген қайраткері Теміржан Ержановтың шығармашылық кеші өтті.

 

Халықаралық деңгейде танылған музыкант көрерменге Бах, Бетховен, Шопен сынды классикалық композиторлардың үздік туындыларын орындап, түркістандықтар мен қала қонақтарына ерекше рухани кеш сыйлады. Концертте кешеннің артисі, Халықаралық байқаулардың лауреаты, баритон Айдос Иманжаппаров пен белгілі тенор Жұмабек Қаңтарбаев өнер көрсетті. Жалпы жиында әйгілі Моцарттан бастап, Пуччини, Верди, Рахманинов, Бизе, Джордано, Д’Анибале секілді әлемдік музыка классиктерінің шығармалары орындалды.

 

Кеш барысында «Alqonyr» фольклорлық ансамблі де ұлттық музыка үнінің бояуымен концерттің көркем өрнегіне айналды. Естайдың «Құсни Қорлан», Алмас Серкебаевтың «Presto» шығармаларын орындады.

Концертке келген тыңдармандар орындаушының шеберлігіне тәнті болып, ризашылықтарын білдірді. Бұл кеш Түркістанның мәдени өміріндегі айтулы оқиға деуге болады.

 

Айта кетейік, ол 1993 жылы Германияның Цвиккау қаласында өткен Шуман атындағы халықаралық байқауда Қазақстан атынан қатысып, ел тарихында алғаш рет бірінші жүлде мен алтын медаль жеңіп алған музыкант атанды. Содан бері ол Еуропа, АҚШ, Азия және Латын Америкасының әйгілі сахналарында өнер көрсетіп, Карнеги Холл, Берлин Концертхаусы, Лейпциг Гевандхаусы, Санкт-Петербург пен Мәскеу филармониялары секілді залдарда концерт берді.

 

Түркістан облысы мәдениет басқармасының баспасөз қызметі